Hêzên Siyasî yên Rêveberiya Xweseriya Demokratîk û MSD’ê derbarê îdiayên danûstaninên bi rêjîmê re û destûra nû de daxuyaniyek dan. Di daxuyaniyê de wiha hat gotin, “Heta niha ti hevdîtin pêk nehatine. Îdiayên ku tên kirin bi armanca derxistina tevliheviyê ye.” Hêzên siyasî dan zanîn ku yên teror li Sûriyê têk biriye mafê wane ku beşdarî danîna destûreke nû bibin.
Hêzên Siyasî yên Saziyên Rêveberiya Xweseriya Demokratîk û MSD’ê destnîşan kirin ku heta niha tu danûstandinên wan bi rêjîma Sûriyê re çênebûne û diyar ku îdayên têne kirin, bi armanca derxistina tevliheviyê di navbera gelê Bakurê Sûriyê de pêk tê û destnîşan kirin ku hêzên teror têk birin, mafê wan e ku beşdarî amadekariya destûrê bibin.
Hêzên siyasî yên Rêveberiya Xweseriya Demokratîk û Meclisa Sûriya Demokratîk MSD’ê der barê mijarê de daxuyaniyek da. Di daxuyaniyê de ev tişt hate gotin:
“Ji destpêka aloziya Sûriyê ve û bi rihê berpirsyariya netewî ya dikeve ser milê me, wekî hêzên siyasî yên Bakurê Sûriyê, me gelek insîyatîf û nexşerê ji bo bidawîkirina aloziyê pêşkêş kirin. Lê rêjîma Sûriyê û opozîsyona derve bi înada xwe û hevgirtina xwe ya bi hêzên derve re ku piştgiriya xwe ji wan girtine û bikaranîna çekan bû sedema kûrbûna aloziyê. Ev yek jî bû sedema ku kareseta mirovî bi serê gelê Sûriyê de were. Ev yek bû sedema ku binesaziya herêmê were rûxandin û derî ji çeteyên wekî DAIŞ, Nusra û gelek komên din ên tundrew re were vekirin. Sûriye bi vê yekê bû meydana şerê hêzên herêmî û navdewletî.
Bi baweriya me ku çareseriya siyasî tekane rêya bidawîkirina aloziyê ye, piştgiriya me ji hemû insiyatîfên navdewletî re û di serî de daxuyaniya Cinêv-1, Biryara Konseya Ewlekariyê-2254 û hemû biryarên girêdayî aloziya Sûriyê hebû. Tevî heta niha em ji wan civînan hatin dûrxistin, ji rihê berpirsyariyê ya bilind û ji bo bidawîkirina aloziya ku gelekî kûr bûye, me ragihand ku em ji hemû xebatên danûstandinan ên ji bo çareseriya siyasî re amade ne.
Ji ber çareseriya siyasî bê Danûstendina Niştimanî ya Sûrî-Sûrî ya bi sponsoriya navdewletî, wê pêk neyê. Ew tekane rêya çareseriya aloziya heyî ye. Hêzên rêjîma Sûriyê û ragihandina wan ev ragihandin û însiyatîfa me ya heyî bi derxistina îdiayan bi kar anîn. Ji bo vê yekê hin mijar bi zanebûn xistin rojevê û gotin ku bi Rêveberiya Xweser a Demokratîk re li hev kiriye. Rêjîm bi vê yekê dixwaze tevliheviyê di nav gelê me yê Bakurê Sûriyê de derxe û baweriya gel a bi rêveberiyê lewaz bike.
Em hêzên siyasî yên di damezirandina Rêveberiya Xweser de cih girt û Meclisa Sûriya Demokratîk tekez dikin ku heta vê kêliyê bi rêjîma Sûriyê re tu danûstandin pêk nehatine, tişta tê belavkirin jî ji rastiyê dûr e. Lê di heman demê de em ji dansûtandinan bi hemû aliyê Sûriyê ji bo çareseriyê û bidawîkirina aloziya heyî û avakirina Sûriya demokratîk a nenavendî re amade ne.
Di heman demê de em ji Neteweyên Yekbûyî û hikumetên bibandor ku rola wan di bidawîkirina aloziya Sûriyê de hebe û bi taybet Amerîka û Rûsya daxwaz dikin ku rola xwe pêk bînin.”
