Lîloz Hisên/Qamişlo
Şêniyên gundê Girê Siwêr projeya avakirina xanan li ser erdên xwe red kirin, lewma Şaredariya Gel a Bajarê Qamişlo danîna kevirê bingehîn yê vê projeyê heta demeke nediyarkirî tolaq kir.
Şaredariya Gel a bajarê Qamişlo projeyeke avakirina xanên pez û embarên êm ji bo xizmetiya semandaniya sewalî li gundê Girê Siwêr dabû destpêkirin û dihat payîn ku îro kevirê bingehîn bihata dayîn.
Şêniyên gund di derbarê vê yekê de daxuyaniyek dan û hin xalên ku tekezî li ser wan hat kirin wiha ne :
-Biryara şaredariyê ya veqetandina projeyê ji saziyek ne diyar re bêyî ku ew bikeve îhaleya giştî, binpêkirinek eşkere ya pergala îhale û kirînê ya hikûmetê ya derbasdar e.
-Ev kiryar wekî binpêkirineke cidî ya prensîbên qanûnî tê hesibandin û gumanên gendeliya îdarî û darayî derdixe holê, di heman demê de şaredariyê ji her îdiayeke şefafiyetê bêpar dihêle.
-Binpêkirineke eşkere ya mafên milkê taybet (berevajî Qanûna Tomarkirina Erdê û Qanûna Milkê Dewletê).
-Ew eşkere qebûl dike ku erd wekî “erdên çandiniyê yên dewletê” tê dabeşkirin, ango ew wekî pereyên giştî tê hesibandin, ev tê vê wateyê ku birêvebirina pereyan û biryardana çarenûsa wê bi tevahî ne di desthilata şaredariyê de ye.
-Mikurhatina şaredariya Qamişlo di daxuyaniya xwe de ku ew ne xwediyê desthilatê ye ku biryarê li ser statuya yasayî ya dawî ya erd bide û wê vegerîne xwediyên wê, mikurhatinek xeternak e ku nebûna desthilata wê nîşan dide.
-Hewldana şaredariyê ji bo misogerkirina şîrketa xwe bi rêya tezmînatê di rewşa biryara vegerandina erd bo xwediyên wê de, delîla dawîn a zanîna wê ya berê ji neqanûnîbûna projeyê û îhtîmala betalkirina wê ye.
-Gotinên geş ên şaredariyê derbarê aliyên jîngehî û tenduristiyê yên projeyê de hewldanek e ji bo xapandina raya giştî, ku ev yek ji ber têkçûna wê ya mezin di erkên herî hêsan de jî, têk diçe.
-Têkçûna wê di mijarên wekî krîza paqijiyê, veguhestina depoya çopê ya “Elî Fero” ji taxa Hîmo bo taxa Cûdî û projeya “Parko” ya têkçûyî de, delîlên ne guncavbûna şaredariyê ji bo birêvebirina projeyên bi vî rengî ne.
-Hewldana şaredariyê ya sînordarkirina çarçoveya nerazîbûnan bi “hejmareke piçûk ji malbatan” înkarkirina rastiyê ye. Ji aliyê meclisa bajarokê Til Merûf û pênc komîn û gundan ve, ku ji dehan malbatên ji eşîrên Kurd ên esîl pêk tên, nerazîbûnên kolektîf û giştî hene. Ev paşguhkirin delîlek din a bêrêziya şaredariyê ji bo îradeya gel e.”
Şêniyên gundê Girê Siwêr projeya avakirina xanan li ser erdê gundê wan bi giştî red kirin û li hemberî şandeyeke ji şaredariya Gel a Bajarê Qamişlo ji bo danîna kevirê bingehîn a projeyê protestokirin, di encama nîqaşên di nava her du aliyan de, biryar hat dayîn ku vekirina projeyê bê tolaqkirin heta biryareke dawî ji hêla parêzgerê Hesekê bê dayîn.
