Navenda nûçeyan
Serokê Rûsyayê Vladimîr Pûtîn got serokê hêzên Wagner xiyanet li gel kiriye û dê cezayê wî giran be.
Serokê Rûsyayê Vladimîr Pûtîn li ser tevgera çekdarî ya ku şeva borî ya serokê hêzên Wagner Yevgeny Prigozhin got bersiva her ‘îsyanekê’ dê tund be.
Pûtîn di hevpeyvînekê ku kanalên Rûsyayê îro weşandî de, anî ziman ku nêzîkatiyên serokê Wagnerê mîna derbeyeke ji pişt ve ye.
Pûtîn got kesên li hemberî artêşê çekê rakin ‘xayîn’ in û wiha lê zêde kir: “Bersiva me dê li hemberî van gefan û li hemberî xayînan tund û hişk be.”
Her wiha ragihand ku artêş dê dewlet û welatiyan ji hemû gef û ‘xiyaneta li hundir’ biparêze.
Li gorî nûçeya Reuters’ê ku agahiyên xwe spartine çavkaniyekî Rûsî, koma paramîlîter Wagner li bajarê Voronezh ê ku 500 kîlometreyan dikeve başûrê Moskovê, dest danîn ser kargehên leşkerî.
Li gorî nûçeya AFP’ê jî, lîderê Wagnerê Yevgeny Prigozhin vê sibehê derbasî baregeha giştî ya fermandariya artêşê ya li bajarê Rostov bû û tevî balafirgehê cihên leşkerî kontrol kirin.
Prigozhin roja îna borî banga serhildanê li hemberî fermandariya artêşa Rûsyayê kiribû û artêş bi kuştina gelek endamên Wagnerê di êrişên li Ukraynayê de tawanbar kiribû. Moskovê ev tawan derewandin û bi tawana ‘banga îsyana çekdarî dike’, ji çekdarên Yevgeny Prigozhin xwest wî bigirin.