Rêxistina Efûyê, ji bo 7 girtiyên Kurd ên ku jê re biryara darvekirinê hatî dayîn banga lezgîn kir

Navenda nûçeyan

Rêxistina Efûyê ya Navneteweyî ji bo 7 girtiyên Kurd ku bi hinceta beşdarbûna Serhildana ‘Jin, Jiyan, Azadî’ biryara darvekirinê ji wan re hatiye dayîn, kampanyaya îmzayan destpê kir û banga lezgîn kir.

Di 16’ê Îlona sala 2022’yan de bi qetilkirina jina Kurd Jîna Emînî ji aliyê polîsên hîcab ên Îranê ve, Serhildana ‘Jin, Jiyan, Azadî’ bi pêşengtiya jin û ciwanan li seranserê Rojhilatê Kurdistanê û Îranê destpê kir ku hîna berdewam e.

Dewleta Îranê bi hinceta beşdarbûna Serhildana ‘Jin, Jiyan, Azadî’ ya li Rojhilatê Kurdistan û Îranê berdewam dike, ji bo 7 girtiyên Kurd, biryara darvekirinê pejirand.

Rêxistina Efûyê ya Navneteweyî (AMNESTY INTERNATİONAL), bi daxuyaniyekê ragihand ku metirsiya darvekirinê li ser  7 girtiyên Kurd ku ji aliyê dewleta Îranê ve biryara darvekirinê jê re hatine dayîn, heye û her wiha bang kir ku divê bi lezgîn li dijî vê yekê dest bi çalakiyan were kirin.

AMNESTY’ê ji bo 7 xwepêşandanên girtî ên Kurd ku navê wan eşkere kir, kampanyaya îmzayan da destpê kirin û wiha got: “Mihemed Boroxanî û Mehend Sedret Medenî li parêzgeha Elburz, Mecîd Kazimî, Salih Mîrhaşimî û Saîd Yaqûbî li parêzgeha Esfehanê, Mûcahîd (Ebbas) Kurkur li parêzgeha Xozistanê, Îbrahîm Narûyî, Mansur Dahmerde, Kambîz Harut, Şuayîb Mîr Beluçehî Rîgî, Mansur Hut û Nîzamuldîn Hut li parêzgeha Sîstan û Belucistanê, Manuşehr Nehman Navaz, Mihemed Gobadlu, Saîd Şirazî, Ebulfazil Mehrî Huseyîn Hacîlu û Muhsîn Rezazade Garagolu jî li parêzgeha Tehranê hatin darizandin. Ji bo herî kêm 7 girtiyan ku wan bi qestê kesê ne kuştiye, di çarçoveya kataloga ku pêwîst nake cezayê darvekirinê ji wan re were dayîn, cezayê darvekirinê hate dayîn.”