Dilyar Cizîrî
Piştî erdheja 6’ê Sibatê ya li Bakur, Tirkiyê û beşek mezin ji Sûriyê pêk hat her kesî wiha texmîn kir, wê ev bobelata mirovî bandorê li şerê li Sûriyê jî bike. Hêviyên bibe destpêka pêngaveke nû ya ber bi çareseriyên mirovî. Bi taybet jî piştî erdhejê hikûmeta Erdogan û tevahî partiyên din bi hilbijartinên Perlemen û Serokkomariyê mijûl bûn.
Demek dirêj di ser encamên hilbijartinê re derbas nebû û Erdogan û hikûmeta wî ya hemû hêza dewletê xistibû xizmeta xwe û bi gelek rê û rêbazan serî li hîlebaziyan da. Di encamê de cihê xwe di serokomariyê de parast û li cihê xwe ma. Hema encam hatin ragihandin, planên dewleta Tirk ên li dijî herêmên Bakur û Rojhilatê Sûriyê careke din destpê kir.
Ev bi hevdîtinên çar alî yên di navbera Rûsiya, Tirkiyê, Îran û hikûmeta Şamê re destpê kir û bi êrişên dijwar ên di 10’ê hizêranê de destpêkirin, dewam dike. Ewan xwestin bi plan û hevdîtinên bi dijberên herêmê re destpê bikin. Lê dema Rêveberiya Xweser di 10’ê hizêranê de bi daxuyaniyekê mijara dadgehkirina girtiyên DAIŞ’ê yên di girtîgehên Bakur û Rojhilatê Sûriyê danî ser maseyê, lez dan planên xwe.
Êdî dest bi êrişên leşkerî kirin û xwestin mijara dadgehkirina çeteyên DAIŞ’ê û berxwedana şervanên QSD’ê ya li dijî şaneyên razayî yên DAIŞ’ê asteng bikin. Erdogan û hikûmeta wî ya şer bi van êrişan dixwazin beşek din ji herêmê dagir bikin û rojevên pêşketina sîstema Rêveberiya Xweser nîşan bidin, ji hole rakin.
Bûyera reva girtiyên DAIŞ’ê yên di girtîgehên Tirkiyê yên li Serêkaniya dagirkirî jî beşekî planê ye. Dixwazin li gel êrişên heyî tevgera şaneyên razî yên çeteyên DAIŞ’ê hîn zêdetir bikin. Bê aramiyê di herêmê de zêdetir bikin. Pêre jî mijara çûyîna Heyet Tehrîr El-Şam (Cebhet El-Nusra) a ber bi Helebê xistin rojevê û bi wê jî xwestin hîn zêdetir zextê li hevkarên xwe Rûsiya, Îran û Hikûmeta Şamê bikin.
Bi taybet di demekê de civîna wan a 4 alî ku tê payîn di 21’ê Hizêranê de were lidarxistin, hatiye. Tirkiyê bi van mijaran dixwaze zextên xwe zêde bike, da karibe li dijî herêmên Şehba û hin herêmên din êrişên hîn berfirehetir pêk bîne. Ji ber wê jî wê di van rojên beriya civînê de û dema civînê de êrişên xwe yên li dijî herêmê hîn zêdetir bike.
Ya ji êrişan hîn girantir jî şerê taybet û siyasetên reşkirin û astengkirina projeyên xizmetguzariyê ne. Di rojên pêş de wê siyasetên şerê taybet û êrişên li dijî herêmê hîn bêtir pêk werin. Di nerîna min de wê pêşwaziya gelê me ji demsala havînê re girantir be.
Îcar pêwîstî bi baldarî û mezinkirina asta berxwedan û tekoşînê heye. Çawa dijminên me li ser tunekirina me û destkeftiyên me dighêjin hev û hewl didin yekîtiya xwe pêk bînin. Pêwîste gelê me jî li ser esasê hişmendiya Netewa Demokratîk sîstema xwe ya parastinê hîn zêdetir pêş bixîne û wekî her carê planên wan li nav çavên wan xîne.