Dewleta Tirk a dagirker di avakirina baregehên xwe yên leşkerî yên di nava xaka Başûrê Kurdistanê de berdewam e. Hat ragihandin ku tenê li derdora bajaroka Şêladizê ya ser bi Amêdiyê artêşa Tirk 10 baregehên leşkerî avakiriye. Her wiha ji ber zext û êrişên artêşa Tirk a li deverê, bi hezaran malbat ji gundan koçî Dihok û bajarokên girêdayî wê bûne.
Rojnameya Hawlatî di raportek xwe de îşaret bi hebûna baregehên leşkerî yên dewleta Tirk ên li herêma Behdînanê kir. Di raportê de hatiye diyarkirin ku artêşa Tirk li nava xaka Başûrê Kurdistanê bi sedan gund û herêman dagirkiriye. Her wiha li hinek bajarok û gundên sinorê Dihokê hatûçon qedexe kirine.
Di raporta rojnameyê de hatiye gotin ku bajaroka Şêladizê ya ku 30 kîlometran ji navçeya Amêdiyê ya ser bi Dihokê dûre, ji ber êrişên dewleta Tirk, piraniya gundên wê vala bûne.
Li gorî agahiyên ku Rêveberê Şêladizê Rizgar Ubêd dane rojnameyê, ji ber êrişên berdewam ên dewleta Tirk a dagirker, 85 gundên dikevin nava sinorê bajaroka Şêladizê vale bûne. Rizgar Ubêd diyarkiriye ku di wan gundan de jiyan bi temamî nemaye, her wiha qedexeya hatûçûna wan gundan hatiye ragihandin û ji xelkê deverê re hatiye gotin ku nabe kes serdana wan gundan bike.
Welatiyê bi navê Nayif Sîteyî yê ji komelgeha Sîrê ya ser bi Şêladizê ye, gotiye ku gundên hatine valekirin, wek kampan lêhatine, derdora wan hemû hatine girtin û welatî nikarin bi rehetî hatûçonê bikin.
Mamostayê Zanîngehê û xelkê komelgeha Sîrê Dilşad Nesrullah jî li ser mijarê agahî dane rojnameyê û gotiye; “Niha artêşa Tirk nêzî 10 baregehên leşkerî li ser çiya û girên derdora Şêladizê avakiriye. Ev baregeh dikevin devera Mam Reşa, Kêrya Dêrê, Serê Darê û Kelha Bêde. Her wiha artêşa Tirkiyê hêzek zêde li herêmê bi cih kiriye.”
Dilşad Nesrullah diyarkiriye ku gundên vala bûne, her yek ji wan herî kêm 50 ta 75 malbat têde hebûn. Ji ber metirsiya êrişan koçî navenda Şêladizê, Dêrelok, Sersing, Qediş, Amêdî û Dihokê bûne.