Desteya Çandê ya Rêveberiya Xweser deverên şûnwarî tamîr dike û ji bo parastina wan bang li şêniyan dike.
Li Bakur û Rojhilatê Sûriyeyê gelek cihên dîrokî û şûnwar hene. Desteya Çand û Hunerê ya Rêveberiya Xweser a Bakur û Rojhilatê Sûriyeyê ji bo parastina van cihan komîte ava kirine.
Cîgirê Hevserokatiya Desteya Çandê Zerdeşt Îsa têkildarî mijarê got: “Desteya Çandê ya Rêveberiya Xweser gelek komîte ava kirin. Mîsyona van komîteyan; deverên dîrokî biparêzin, wan arşîv bikin û rê li ber binpêkirinên li dijî şûnwaran bigirin.”
Îsa destnîşan kir ku ji bo parastina şûnwaran parêzvan û çavdêr hene û wiha domand: “Piştî ku cihên şûnwarî hatin tespîtkirin, raporeke der heqê wan de hat amadekirin. Di raporê de binpêkirinên ku komên çeteyan li dijî şûnwaran kirine, hatin parvekirin.”
Îsa bi bîr xist ku dema çeteyên DAIŞ’ê û komên terorîst herêm dagir kiribû, şûnwar talan dikirin û dikolan, lê niha binpêkirin hema bêje nemaye.
Zeredeşt Îsa diyar kir ku Desteya Çandê çavdêriya deverên şûnwarî yên Bakur û Rojhilatê Sûriyeyê wekî Girê Mozan, Til Beyder, Keleha Caber, Sûra Reqayê, Keleha Necim dike.
Îsa bang li şêniyên Bakur û Rojhilatê Sûriyeyê kir ku mîrateya çanda herêmê biparêzin û got: “Deverên dîrokî ne milkê kesekî yan herêmekê ne, lê milkê tevahî gelên herêmê ne. Ji ber vê yekê divê ev cih werin parastin.”
Desteya Çandê, semîneran li ser girîngiya parastina cihên dîrokî dide şêniyan.