Endamê Kongreya Netewî ya Kurdistanê Şoreş Xidir diyar kir ku dema wê hatiye di sedsaliya Lozanê de Kurd dijî peymanê bibin xwedî yek helwest û bibin yek. Xidir got; “Ji bo vê em dixwazin di 22-24’ê Tîrmehê de li Lozanê kongreyek nîştimanî û mezin lidarbixin.”
Tê payîn bi boneya salvegera 100 saliya Peymana Lozanê, Kongreya Netewî ya Kurdistanê (KNK) bi tevlîbûna hemû pêkhateyên çar parçeyên Kurdistanê, li bajarê Lozan ya Swîsreyê, kongreyek nîştimanî û mezin lidarbixe. Li ser vê mijarê endamê KNK’ê Şoreş Xidir axivî.
Şoreş Xidir da zanîn ku Peymana Lozanê, yek ji wan peymanên hemberî netewa Kurd û hemû pêkhateyên Rojhilata Navîn, ji aliyê dewletên dagirker ve hatiye îmzekirine. Şoreş Xidir got ku di salvegera sedsaliya vê peymanê de, dema hatiye Kurd dijî vê peymanê bibin xwedî helwest.
Xidir destnîşankir ku KNK projeyek netewî û nîştimanî weke erkek xwe dizane û wiha dom kir; “Bivê armancê em dixwazin di 22-24’ê Tîrmeha 2023’yan de li bajarê Lozanê kongreyek netewî ku pêkhateyên her çar pareçeyên Kurdistanê tevlîbibin, lidarbixin. Ji bo ku ev kongre bikeve rojevê, li ser asta her çar parçeyên Kurdistan û dervey welat, wê xebat bên meşandin. Em bang li hemû aliyên siyasî, kesayet, mamostayên zanîngehê dikîn ku di vê mijarê de xwedî gotin bin.”
Di dawiyê de endamê KNK’ê Şoreş Xidir ragihand ku ewê bi alîkariya hemû kes û partiyên siyasî yên di nava KNK’ê de hemû astengiyan bişkênin û got; “Hêvîdarim em bikarin encamek baş bidest bixin. ROJNEWS
