“Li dijî qirkirina siyasî ya jinan, dengê xwe bidin namzetên jin”

Bi armanca piştgiriya namzetên Partiya Çepên Kesk di hilbijartinên 14’ê Gulanê de, Kongra Star a Herêma Cizîrê bi dirûşma “Li dijî qirkirina siyasî ya jinan, dengê xwe bidin namzedên jin” mîtîng hat lidarxistin.

Birûc Resûl/ Qamişlo_

Kongra Star a Herêma Cizîrê bi dirûşma “Li dijî qirkirina siyasî, dengê xwe bidin namzedên jin” mîtîngek li bajarê Qamişlo  li dar xist. Mîtîng li stadyûma Heysem Kiço ya bajarê Qamişlo- Bakur û Rojhilatê Sûriyeyê bi tevlbûna hemû sazî û rêxistinên jinan ên li herêmê hat lidarxistin.

Mitîng bi deqeyek rêzgirtinê ji bo pakrewanên azadiyê hat destpêkirin. Piştî wê li ser navê Kongra Star Berdevka Kongra Star Rîhan Loqo axaftin kir.

Rîhan Loqo diyar kir ku Şoreşa ku bi pêşengiya jinan li cîhanê deng veda îro careke din bi pêşengiya jinan dîrokê dinivîsîne û wiha got: “Li Bakurê Kurdistanê bi pêşengiya jinan, hezkirin û îradeya wan, jinên berxwedêr mohra xwe li dîrokê dixin û dê biçin hilbijartinan. Wê Bakurê Kurdistanê bi hilbijartinên demokrasî û wekheviyê bi pêş bixin. Em di wê baweriyê de ne ku berî niha jî jinan berxwedaniyeke dîrokî dane meşandin, ji bo aramî, aştî û wekhevî û civaka demokratîk em hemû piştgiriya jinên Bakurê Kurdistanê dikin. Bi fikir û felsefeya azad wê careke din hilbijartinên dîrokî bi pêşengiya jinan bi ser bikeve.”

Rîhan Loqo da xuyakirin ku li Tirkiyeyê 14’ê Gulanê hilbijartin dest pê dikin û wiha domand: “Ev hilbijartin bi taybetî ne tenê ji bo Bakurê Kurdistanê û Tirkiyeyê girîng in ji bo giştî Kurdistanê û Rojhilata Navîn her wiha ji bo gelê ku bi salan e têkoşînê didin meşandin girîng in ji ber wê pêşeroja gelek mijaran diyar bibe. Dewleta tirk a dagirker bi hemû rêbazên xwe yên şer êrîşî destkeftiyên şoreşa jin û îradeya jinên zana kir ji ber ew ji deng û pêşengiya jinan di tirs e. Her wiha li Bakurê Kurdistanê jî êrîşî îradeya azad ya ku civakê bireve dibe kir. Dewleta tirk wê hemû hewldanên xwe bike ku jin bi ser nekevin ji bo wê em ê jin bibin dengê jinên azad. Werin em bi hev re piştgiriyê bidin namzeda jinan û têkoşîna wê ya azadiyê bi armanc biki.”

 Piştî qedandina axaftina Rîhan Loqo ,mîtîng bi gerandina govendê bi dawî bû.