NAVENDA NÛÇEYAN
Piştî êrişa dewleta Tirk a li dijî Balefirgeha Navneteweyî ya Silêmaniyê, hem xelkê Başûrê Kurdistanê û iraqê û hem jî gelek siyasetmedarên Kurd û Iraqê ji hikûmetê dixwazin gavên pêşwîst biavêje.
Piştî êrişa 7´ê Nîsana bihurî ya li nêzî balefirgeha Silêmaniyê, li gelek bajarên Başûrê Kurdistanê xwepêşandn hatin lidarxistin. Xwepêşandanan doh jî dewam kir. Li Wargeha penaberan a li Mexmûrê welatiyan êrişa dewleta Tirk rûreş kir. Wekî din şandeyeke Bexdayê çû Silêmaniyê ji bo hevdîtin û lêkolînan. Parlamenterê Hevpeymana Dewleta Yasa, Arif Hemam jî ji Iraqê xwest giliyê dewleta Tirk bike. Lê pirsa sereke ya piştî vê êrişa li dijî balefirgeheke seferên sivîl, ew e, ka gelo dewleta iraqê wê di warê qanûnî de dest hilîne yan na.
Xwendekarên dibistanan û xelkê Wargeha Penaberan a Şehîd Rustem Cûdî (Mexmûr) êrişa ji aliyê balefirên bê mirov ên dewleta dagirker a Tirk ve li ser balefirxaneya navneteweyî ya Silêmaniyê, bi tundî şermezar kir. Xwepêşandanan bi daxuyaniyekê êriş şermezar kir.
Xwendekar û şêniyên wargehê beriya daxuyaniyê bidin, rêz girtin ji bo tevahî şehîdên şoreşa Kurdistanê. Endamê rêveberiya dibistana amadeyî ya Şehîd Koçerîn Mamoste Mistefa Ergen daxuyanî da.
Mamoste Mistefa Ergen destpêkê êrişa 7’ê Nîsanê ya li dijî balefirxaneya Silêmaniyê şermezar kir û got, “Dema em temaşe dikin li kîjan welat, bajar û parçe dibe bila bibe, her tim pêşengên Kurd, kesayetên ku ji bo standina mafên mirovahiyê hemûyî ked dane, berdêl dane û canê xwe bexşandine, bûne hedefa êrişan. Dîsa pêşengên Gelê Kurd yên li Rojava ku li gel berpirsên YNK’ê dema ji bo karekî kom bûbûn li wir êrişek li dijî wan pêk hat. Rejîma faşîst AKP û MHP´ê, her wiha xiyanetkarên Kurd yên di nava Kurdan de armanceke wan ew e ku kesayetên dengê Kurdayetiyê bilind dikin, kesayetên ku li rûmeta mirovatiyê xwedî derdikevin, bikin armanc. Em jî weke hemû xwendekar, mamoste û tevahiya xelkê wargehê bang li raya giştî dikin da ku li erkên xwe yên mirovbûnê xwedî derkevin.”
Heyet wê raporê bide parlamenê
Li aliyê din şandeke parlamena Iraqê li Silêmaniyê serdana cihê êrişa li dijî balafirxaneya Silêmaniyê kir. Şandeya parlamena Iraqê bi serokatiya serokê Lijneya Asayîş û Parastinê ya parlamenê Ebas Sebrî çû Silêmaniyê. Parlamenterên Iraqê Karwan Yarweys û Kemal Axa ên ser bi fraksiyona YNK’ê ve şandeya parlamenê pêşwazî kir. Şande çû serdana balafirxaneya Silêmaniyê û li cihê êrişê lêkolîn kirin. Li gorî agahiyan şande piştî lêkolînên xwe wê derbarê êrişê de raporekê amade bike û pêşkêşî parlamena Iraqê bike.
Divê Iraq giliyê Tirkiyê bike
Parlamenterê Hevpeymana Dewleta Yasa, Arif Hemamî jî got, Tirkiye gelekî ketiye nava xaka Iraqê û herî dawî jî êrişî balafirxaneya Silêmaniyê kiriye. Arif bang li Hikumeta Iraqê kir da ku li ser asta navneteweyî, giliyê Tirkiyeyê bike. Arif Hemamî ji Rojnewsê re axivî û got, dewleta Tirk gelek ketiye nav xaka Iraqê û hertim êrişên asmanî dike.
Arif êrişa dawî ya dewleta Tirk a li dijî balafirxaneya Silêmaniyê bi bîr xist û xwest ku Hikûmeta Iraqê dijî van êrişan gavan bavêje.
Arif di dawiyê de bang li Hikûmeta Iraqê kir da ku li dijî êrişên Tirkiyeyê li meqam û dadgehên navneteweyî giliyê Tirkiyeyê bike.
