Meclisa Kongra Star diyar kir ku Dayika Uweyş berhemekî bêhempa diyarî gelê Kurd kir û got, perwerde û têkoşîna dayika Uweyş hişt ku têkoşîna jinan zindî bibe û Kurd ji xewa mirinê şiyar bibin.
Navenda Nûçeyan
Meclisa Kongra Star bi wesîleya salvegera wefata dayika Rêberê Gelê Kurd Abdullah Ocalan Uweyş daxuyaniyek nivîskî weşand.
Kongra Star di daxuyaniya xwe de wiha got: “Rêber Abdullah Ocalan ji bo dayika xwe dibêje, “Ew tam tufaneke serihildêriyê bû û dizanim ku dayika min têkoşerek mezin e. Di temenê biçûk de têkoşîn fêrî min kir. Hîn jî bandora wê li ser min heye. Dayika min hestek wiha bi min re afirand. Tu xwe bispêrî min, piştgirî û alîkarî ji min bigirî, wisa bi girîn û gazin nikarî bijî. Divê teqez tu bi xwe bersiv bidî. Ev yek dibe sedema hestê xwegihîştin û tolhildanê. Li gund bi serhildêriya xwe dihat nasîn. Li hember kesî serî neditewand. Jin, mêr ferq nedikir, bi ser de diçû, hesab dipirsî.Ji xwe ji ber bandora dayika xwe ez wiha nêzî têkoşîna jinan bûm.” Fatma Ocalan jî dibêje, “Diya min li ber neheqiyê serî neditewand, mêvanperwerbû û gelekê dihat hezkirin.”
Kongra Star da xuyakirin ku Dayîka Uweyş dibistana destpêkê bû û wih got: “Belê Dayika Netewî Dayika Uweyş berhemekî bêhempa diyariya gelê Kurd kir, perwerde û têkoşîna dayika Uweyş hişt ku têkoşîna jinan zindî bibe û Kurd ji xewa mirinê şiyar bibin. Rêya azadiyê nîşanî jinan kir. Dayika Uweyş dibistana destpêkê bû ku Rêberekî wekî Rêber Apo ji bo cîhanê bûyî roj û ronahiyê belav dike û azadiya jin asas digire. Li ser esasê vê fikir û ramanên Rêberê Rêberan Rêber Apo, îro bi hezaran jin li serê çiyên Kurdistanê, li warê xwedewandan, ji bo nûjenkirina eşqa Mem û Zîn, Edûlê û Derwêşê Evdî, Xecê û Siyabend têdikoşin. Di encama vê felsefeye de îro li cîhanê bi milyonan mirov li ser felsefeya ‘Jin Jiyan Azadî’ têdikoşin. Ev hemû bingeha xwe ji perwerdeya rast, kesayeta serhildêr a dayika Uveyş digire”
Meclisa Kongra Star daxuyaniya xwe wiha qedand: “Bi vê boneye em bejna xwe li ber bîranîna Dayika Uweyş, Dayika Netewî ditewînin, hemû dayikên şehîdan û jinên têkoşer, di salvegera wefata Dayika Netewî Dayika Uweyş de bi bîr tînîn û dibêjin bila ruhê wê şad be.”