Navenda Nûçeyan/Qamişlo.
Hevgirtina Rewşenbîrên Rojavayê Kurdistan (HRRK) encama Pêşbirka Helbestên Kurdî yên Ciwanan ragihand û helbesta ’Ku Tu Werî’ ya Ahîn Elumer asta yekê girt.
Bi amadebûna endamên HRRK`ê û Komîteya Nirxandina Helbestan, li navenda HRRK`ê ya bajarê Qamişlo encamên Pêşbirka Helbestên Kurdî yên Ciwanan hat ragehandin.
Di destpêkê de Endamê Komîteya Nirxandina Helbestan Umran Yûsiv derbarê pêşbirkê de axivî û daxuyaniyek xwend, di daxuyaniyê de jî navên kesên ku asta yekê, 2`yan û 3`yan birine anî ziman.
Li gorî encamên pêşbirikê helbesta ’Ku Tu Werî’ ya helbestvan Ahîn Alumer asta yekê stand, helbesta ’Were’ a helbestvan Dilyar Osê asta duyem girt û helbeta’Baskên Kevokê,’ ya helbestvan Xecê Îsa asta sêyem girt. Herwiha xelata asta yekêm 500 dolar, asta duyem 300 dolar û asta sêyem 200 bû.
Hêjayî gotinê ku pêşbirka Îsal bi beşdarbûna 31 helbestvanên ciwan yên Kurd yên Rojavayê Kurdistanê di 1’ê Çileya 2023’an de hatibû destpêkirin. Herwiha ev pêşbirk bi serpirştiya Komeleya Jana Xelef ya Xêrxwaziyê ya Ingilistanê ye û armanc jê jî pêşxistina helbestên Kurdî yên ciwana ye. Pêşbirk salane ye û di roja ji dayîkbûna Janê Xelef de hat raghiandin.