Komîteya Navendî ya PKK’ê şehadeta fermandarê mezin Fazil Botan ragehand û got, em soz didin ku em ê teqez xwedî li armancên Fermandarê mezin Fazil derkevin
Navenda Nûçeyan
PKK’ê ragihand ku yek ji pêşengên tevgera azadiyê û têkoşîna gerîla Fazil Botan şehîd bûye. PKK’ê got, “Wê weke hevrêyekî welê bê bîranîn ku her şaneya xwe tevlî rastiya Rêbertî, têkoşînê, şerê gerîla û PKK’ê kiriye.”
Komîteya Navendî ya PKK’ê ji ber şehadeta Fazil Botan peyamek weşand.
PKK’ê di daxuyaniya xwe de diyar kir ku hêzên wan bi lehengî li ber xwe didin û wiha got: “PKK partiyeke Rêbertî û şehîdan e, li dijî dijminê kujer, faşîst, qirker û zalim têkoşîneke mezin dide. Li hemberî êrîşên dewleta Tirk a faşîst ku bi çek û teknîka herî pêşketî dike, li gel êrîşên dijmin ên bi gazên bi jehr û çekên kîmyewî yên di asta navneteweyî de qedexe ne, artêşa gerîla bi lehengî li ber xwe dide. Dost û dijmin, her wiha dîktator Erdogan-Bahçelî û faşîzma AKP-MHP’ê jî baş zanin ku serketina misoger a artêşa gerîla gelekî nêzîk e. Lewma diperpitin û mîna ku har bûne, êrîş dikin.”
PKK’ê da xuyakirin ku Şehîdê mezin ê partiya wan Fazil Botan wê weke hevrêyekî welê bê bîranîn ku piştî tevlî nava refên partiya wan bû her şaneya xwe tevlî nava rastiya Rêbertî, têkoşînê, şerê gerîla û partiya wan kir û wiha domand: “Weke fermandarê efsanewî yê berpirsyarî û wezîfeya mezin, meş û tevlîbûna mezin, di pêşvebirina artêşa gerîla de bi roleke mezin rabû. Ji dema ku tevlî nava partiya me bû û pê ve pêşketinên mezin afirand û hema bêje li her bihosta xaka Kurdsitanê gerîlatî kir, bi taktîkeke bêhempa ya gerîlatiyê derbên giran li dijmin xist. Bû yek ji fermandarên bijarte. Ji bo dawî li zext û koletiyê bîne, ku bi sedan sal in li ser gelê Kurd û gelên Rojhilata Navîn tê ferzkirin, bi dil û can, bêrawestan têkoşiya.”
Komîteya Navendî ya PKK’ê domand: “Partiya me ku ji 21’ê Adarê roja çalakiya fedaî ya mezin a Hawayê Hemdem hevrê Mazlûm Dogan û heta 28’ê Adarê roja şehadeta fermandarê gerîla yê mezin hevrê Mahsûm Korkmaz weke Hefteya Lehengiyê pîroz dike, şehadeta fermandarê mezin û endamê Komîteya Navendî ya partiya me hevrê Fazil Botan radigihîne, di heman demê de soz didin ku em ê teqez xwedî li armancên wî derkevin. Em careke din dibêjin ku sond rûmet e, em ê ti carî rûmetê binpê nekin. Li gorî soza xwe ku me gotibû em ê bibin şûrê tolhildanê yê tûj ê Mazlûm Dogan, Mahsûm Korkmaz, hevrê Fazil û hemû şehîdên me yên din, em ê vê soza xwe bi cih bînin, em careke din vê sozê didin gelê xwe û gelên cîhanê.”
