Navenda Nûçeyan
Serhildana li Rojhilatê Kurdistan û Îranê ya dijî rêjîma Îranê bê navber dewam dike, tevî kuştin , girtin û işkencekirinê jî, gel serhildana dewam dike.
xelkê Beluçistanê weke her Îniyên borî duh ji qadan bûn.
Serhildana gel ku bi dirûşmeya ‘Jin, Jiyan, Azadî’ li Rojhilatê Kurdistan û Îranê destpêkiribû, bênavber dewam dike.
Di 24’ê Adarê de weke her Îniyên din, bi hezaran kes li bajarê Zahîdan ya Beluçistanê daketin qadan û dijî desthilatê nerazîbûna xwe anîn ziman. Xwepêşandanderan xwestin desthilatdarî were rûxandin. Xwepêşanderên Beluçistanê diyarkirin ku ew dixwazin sîstemek wisan were avakirin ku li Îranê hemû pêkhate bigihin mafên xwe û herêmên xwe birêve bibin. Bi taybet hejmarek zêde ya jinan di xwepêşandanê de amade bûn û bê navber dirûşmeya ‘Jin, Jiyan, Azadî’ qêriyan.
Di heman demê de li bajarê Galîkş ya ser bi parêzgeha Gulistan ku zêdetirî xwe Tirkmen lê jiyan dikin, çalakiyên nerazîbûnê hatin lidarxistin. Di çalakiyan de xwepêşanderan piştgirî dan çalakiyên li Beluçistan û herêmên din yên Îranê.
Hêjayî gotinê ye di 30’ê Îlona 2022’yan de bi destpêkirina serhildana ‘Jin, Jiyan, Azadî’ re li bajarê Zahîdanê jî xwepêşandanek mezin hatibû lidarxistin. Hêzên Îranê êrişî xwepêşanderan kiribûn û herî kêm 100 kes kuştibûn. Ji wê rojê ve her roja Înî xelkê Zahîdan dadikevin qadan.
Cezayê darvekirinê
Li aliyekî din li gorî Malpera Tora Mafê Mirov a Kurdistanê ragihand, di rojên borî de, Dadgeha Şoreş a bajarê Urmiye cezayê 10 sal girtîgehê li 5 kesan û cezayê bidarvekirinê jî 5 welatiyên xelkê parêzgeha Urmiye birî. Tora Mafê Mirov a Kurdistanê diyarkir ku ew 10 kesên hatine cezakirin, xelkê bajarê Urmiye yê ne û bi tometa ‘Tevilbûn û hevkarîkirina sîxûrtiya ji bo Îsraîlê’ hatine cezakirin.
Li gor agahiyê ku Tora Mafê Mirov a Kurdistanê ji çavkaniyek ku nexwestiye navê wî were eşkerekirin wergirtiye, wan girtiyan dibin gef û êşkenceyê de neçar hatine hiştin ku wan tometan li ser xwe qebûl bikin, lê piştî hatine dadgehkirin, wan tometan red kirine û gotine wan dibin gef û êşkenceyê de ew tomet qebûl kiribûn. Ji beriya niha jî gelek kes li Îran û Rojhilatê Kurdistanê bi heman tometa ‘sîxûrtiya Îsraîlê’ cezayê darvekirinê lê hatine birîn û hin ji wan jî hatine darvekirin.
