Navenda Nûçeyan
Bi 100 hezaran Kurd û dostên wan li Kurdistan û gelek cihên cûda yên cîhanê Newroza 2023’an bi coşeke mezin pîroz kirin û gotin, bi rihê agirê Newrozê em ê têkoşîna azadiya fîzîkî a Rêber Apo bilindtir bikin.
Li tevahiya bajarên Kurdistanê û gelek devrên cûda yên cîhanê çalakiyên pîrozbahiya Newroza 2023’an hatin li darxistin.
Amedê
Fînala Newroza 2023’an li Amedê bi dirûşma “Her der Newroz, her dem azadî” pêk hat. Li qadê bi 100 hezaran kes kom bûn. Dika çalakiyê bi rengê reş hate xemilandin û pankarta bi nivîsa “Newroz pîroz be” lê hate daliqandin. Her wiha posterê Jîna Emînî yê bi nivîsa “Bi tayê porê Jîna Emînî em ê têkoşîna jinê bilindtir bikin” û posterê Kemal Kûrkût ê bi nivîsa “Kemal Kûrkût namire” li qada Newrozê hatin daliqandin. Jin û ciwan bi kincên neteweyî tevlî çalakiyê bûn.
Herwiha Serokê Giştî yê YNK’ê Bafil Talabanî jî peyamek ji Newroza Amedê re şand. Talabanî di nameya xwe de banga yekîtiya gelê Kurd kir û balkişand ser girtiyên pêşengên kurdan û got, rêberên me berdin.
Cizîra Botan
Li Cizîra Botan bi deh hezaran kes agirê Newroza azadiyê vêxist û peyama, “Muxatabê çareseriyê Abdullah Ocalan e. Em ê hemû bi hev re vê desthilata dijminê gelan hilweşînin.”
Gelê herêma Botanê li taxa Banê Xanê ya navçeya Cizîrêy a Şirnexê pîrozbahiya Newrozê li dar xist. Bi deh hezaran welatiyên Cizîra Botan û Şirnex û navçeyên wê tev li pîrozbahiyê bûn. Ciwanên ku hatin qada Newrozê di ketina qadê de fişekên hewayî teqandin. Li qadê dirûşmeyên “Bijî Serok Apo”, “Bê Serok jiyan nabe”, “Bijî Newroz”, “Bijî berxwedana zindanan”, “Şehîd namirin” berz kirin. Bi deh hezaran kes sirûdên “Çerxa Şoreşê” û “Kobanê”xwendin.
Qendîl
Newroza Qendîlê ya bi dirûşma “Bijî Serok Apo” demxeya xwe li rojê da, bi gerandina govendê ya li ber stranan dawî bû. Newroza Qendîlê ya 2023’yan a bi dirûşma “Bi xurtkirina têkoşînê Peymana Sedsalî tine dikin û Kurdistanê diparêzin” bi tevlibûna hezaran xelkê çar parçeyên Kurdistanê li Binarê Qendîlê hatibû destpêkirin bi dirûşmên “Bijî Serok Apo” û gerandina govendan bi dawî bû.
Kobanê
Pîrozbahiya Newrozê ya li ser Girê Miştenûr ê Kobanê bi pêxistina meşaleya Newrozê û deqeyeke rêzgirtinê destpê kir. Di pîrozbahiyê de bi hezaran kes beşdar bûn.
Tirbispiyê
Bi hezarên şêneyên navçeya Tirbespiyê li gundê Dirêcîkê Newroz pîroz kirin. Şahiya Newrozê bi coşeke mezin bi rêve çû.
Dirbêsiyê
Bi hezaran şêniyên navçeya Dirbêsiyê û navçeyên Til Temir û Zirganê yên kantona Hesekê cilên xwe yên netewî li qada Newrozê ya li gundê Colbistanê kom bûn, agirê Newrozê dadan
Şehbay
Xelkên Efrîn û Şehbayê bi dirûşma “Bi ruhê berxwedana Newrozê em ê Rêber Apo azad bikin û dagirkeriyê têk bibin” herikîn qada Newrozê. Newroz li gundê Elewşê yê navçeha Ehdasê ya Şehbayê hate pîrozkirin. Qad û dika pîrozbahiyê bi wêneyên Rêberê Gelê Kurd Abdullah Ocalan û rengên Kurdî hatin xemilandin. Pîrozbahiyê bi dirûşma “Bijî Serok Apo” destpê kir.
Heleb
Şêniyên taxên Şêxmeqsûd û Eşrefiyê û hin taxên din ên Helebê ji saetên sibehê de Newroza 2023`yan bi dirûşma “Bi rihê berxwedana Newrozê em ê Rêber Apo azad bikin û dagirkeriyê têk bibin” pîroz kirin. Pîrozbahiya Newrozê li herêma Şiqeyif a Şêxmeqsûdê tê lidarxistin.
Şam
Bi sedan kurd û dostên wan li Stada El Feyha ya paytexta Sûriye Şamê bi dirûşma “Bi giyanê Newrozê dê Rêber Apo azad bikin û dagirkeriyê têk bibin” Newroz pîroz kir.
Di şahiyê de gelek axaftin hatin kirin ku Cejna Newrozê li gelên herêmê pîroz kir û pêwîstiya mezinkirina têkoşînê heta pêkanîna dirûşma Newrozê kir. Di pîrozbahiyê de gelek komên hunerî berhemên xwe pêşandan. Pîrozbahî bi gerandina xelekên govendê bi dawî bû.
Reqa
Meclisa Sivîl a Reqayê şahiya Newrozê li Qada Fakulteya Çandiniyê ya berê ya li Çerxerêya Firosiyê ya li aliyê bakurê rojavayê Reqayê, li dar xist.
Dêrazorê
Şêniyên gundewarê rojhilat ê Dêrazorê Newroz pîroz kir. Di pîrozbahiyê de hate gotin ku Newroz cejn nîşaneya tevgirtina pêkhateyan û biratiya gelan e.
Di nav de endamên saziyên sivîl û leşkerî, şêx û rûspiyên eşîran, bi sedan şêniyên gundewarê rojhilat ê Dêrazorê Newroz li qada bajarokê Hecînê pîroz kir.
Germiyan û Xaneqînê
Li navçeya Kelarê ya li navenda îdareya Germiyanê li ser Qelaya Şêrwane bi tevlîbûna gelek kesan agirê Newrozê hate vêxistin û fîşekên hewayî hatin teqandin.
Li aliyê din yekemcar bi awayekî fermî cejna Newrozê li bajarokê Kifrî yê Germiyanê hate pîrozkirin. Di şahiyê de hunermend Adil Hewramî, Çopî Fetah û Karwan Xebatî bi stranên xwe coş dan şahiyê û girseya gel li ber sitran û mûzîkê govend gerand.
Li bajarokê Xurmato yê ser bi navçeya Xaneqînê jî bi tevlîbûna gelek kesî û parlamenterên Iraqê agirê Newrozê hate vêxistin û govend hate gerandin.
Rojhilatê Kurdistan
Li tevahiya bajar û herêmên Rojhilatê Kurdistanê doh agirê Newrozê hate pêxistin. Serhildana ‘Jin, Jiyan, Azadî’ bi agirê Newrozê gur bû, reng û dengê jinên azad bilind bû.
Li bajarê Seqizê serdana goristanan hate kirin. Bi taybetî bi sedan kes tevî malbata Jîna Emînî, çûn ser gora jina ciwan ya Kurd Jîna Emînî. Jîna Emînî li ser gora xwe hate bîranîn û Newroz li hemû kesên di xwepêşandanan de hatine qetilkirin, hate pîrozkirin.
Li bajarên Sine û Bokanê jî dayikên zarokên wan hatine qetilkirin, bi dirûşma ‘Jin, Jiyan, Azadî’ û ‘Şehîd namirin’ Newroz pîroz kirin û li ser goristanan zarokên xwe bi bîr anîn.
Elmanya, Awûstûrya û Îtalyayê
Li Heîlbron, Kîel û Bîelefeld ku bajarên Elmanyayê ne, li bajarê Innsbrûck ê Awûstûryayê û bajarê Parma yê Îtalyayê, Newroz hat pîrozkirin. Di pêrozbahiyan de bêyî sekin dirûşmeyên “Bijî Serok Apo“, “Bijî Newroz“ û “Jin jiyan azadî“ hatin berzkirin. Meş heta bi qada Keselbrînkê dewam kir.
Marsîlyayê
Li bajarê Marsîlya yê Fransayê bi pêşengiya TCŞ‘ê û TekoJIN‘ê bi dehan ciwan di çarçoveya kampanya “Werîn Cenga Azadiyê“ de daketin qadan û Newroz pîroz kirin
Karlstad
Li bajarê Karlstadê ya Swêd Newroz bi beşdariya bi sedan kes hate pîroz kirin. Li ser navê Partiya Çep Parlementer Hakan Sveneling axaftin kir. Sveneling Cejna Newrozê li tevahî gelan pîroz kir û diyar kir ku ew weke partî û kes piştgirî didin HDP’ê û girtiyên zindanan.
Şahiya Newrozê bi dirûşmeyên ‘Jin, Jiyan, Azadî’ û ‘Bijî Serok Apo’ bi dawî bû.
Japonya
Kurdên li Tokyoyê paytexta Japonyayê û dostên wan ên Japon, Newroz bi hev re pîroz kir. Li Parka Akîgaseyê ku nêzî Tokyoyê ye, Newroz hat pîrozkirin. Bi hezaran kes tev li pîrozbahiyê bûn. Kurd û dostên wan ên Japon tev li pîrozbahiyê bûn, Hevserokê Giştî yê HDP’ê Mîthat Sancar peyamek şand. Hevserokê PYD’ê Salih Mislim jî bi rêya internetê beşdar bû. Koma Dengê Jinên Japonyayê ku ji hunermendên Japon û Kurd pêkhatî jî, tev li pîrozbahiyê bû.