Navenda Nûçeyan / Qamişlo
Pirtûka Rezoyê Osê ya bi navê ‘Berhemên Rezoyê Osê’ di roja salvegera koçikirina wî de, li Navenda HRRK’ê a bajarê Qamişlo hat wajokirin.
Di 4′ ê Adarê de li Navenda Hevgirtina Rewşnbîrên Rojavayê Kurdistanê (HRRK) a bajarê Qamişlo pirtûka wêjevanê kurd, Rezoyê Osê ya bi navê ‘Berhemên Rezoyê Osê’ ya beşa yekem di salvegera 13`mîn a koçikirina wî de, ji aliyê şagirt û hemşeriyê wî ve ‘Memo Ebdî’ ve hat wajokirin.
Nivîskar,helbestvan, zimannas û rexnegerê Kurd Rizoyê Osê , 10`ê Cotmeha 1950`an,li gundê Dekşûrî yê girêdayî bajarê Qamişlo ji dayik bûye û di sala 2010`an de koça dawî kir.
Osê gelek xebat di derbarê ziman û wêjeya Kurdî de kirine û berhemên giranbuha li şûn xwe hiştine; mîna lêkolînên rexneyî, çîrok,helbest û bîranîn wî.
Bi serpiriştiya Navenda HRRK’ê û alîkariya heval, şagirtên û malbata Rizoyê Osê beşek ji berhemên wî di beşa yekê de hatin komkirin, bi amadebúûa nivîskar, helbestvan, rewşenbîr û kesayetên din yên herêma Cezîrê, li Navenda HRRK’ê hat wajokirin û weşandin .
Destpêkê Endamên Navendê bixêrhatina kesên ku di ahenga ji bo wajiokirina pirtûka Berhemên Rizoyê Osê, amadebûn, kirin û piştre deqeyekê rêzigirtinê ser giyanê pakrewanên Krdstanê rawestiyan.
Di berdewamiya vê ahengê de heval û şagirtên zimanzan û wêjevanê Kurd Rizoyê Osê, ew bi bîr xistin û li ser jiyan, ked û xebata wî ji bo ziman û wêjeya wî axivîn.
Yek ji wan şagirtan jî pismamê Osê û wajokarê vê pirtûkê Memoyê Ebdî ye, axivî û sedema çapkirina van pirtûkan da diyarkirin û got:”Berhemên Rizoyê Osê bi zimanekî kurdî yê bedew û herkbar hatine nivîsandin û çapkirin, ev berhem jî dibin jêder ji lêkolînan re. Herwiha dibin waneyên fêrkirinê ji xwendekarên dibistan, peymangeh û zanîngehan re. Gelek mijarên bisûd ji bo wêje û zimanê Kurdî ; mîna mijarên zimannasî, ferhengnasî, rexnevanî, hevoksazî û zargotin Kurdî di nav xwe de dihewîne.”
Ebdî da zanîn ku berhemên Rizoyê Osê wê ji bo beşa 2 û 3’iyan jî di demên pêş de bê amadekirin.
Piştî vê axaftinê pirtûka Rizoyê Osê ya bi navê ‘Berhemên Rizoyê Osê ‘ ji aliyê Memoyê Ebdî ve hat wajokirin û nêzî 200 pirtûkan li kesên ku beşdarî vê ahengê bûbûn, hatin belavkirin. Herwiha xelata wajokirina vê pirtûkê jî, ji malbata Rizoyê Osê re hat dayîn.
