Têkildarî nirxandina ezmûnên pergala serbest û giştî, herwiha rêjeya serketina xwendekaran, endamê Navenda Ezmûnan ya Herêma Cizîrê Ebdulezîz Berzencî peyivî.
Di sala xwendinê ya 2021-2022`ê de Desteya Perwerde û Hînkirinê ya Bakur û Rojhilatê Sûriyê cara yekemîn pergala xwendina serbest ji bo xwendekarên refên 9 û 12`an ragihand û îsal di 19`ê Hezîranê de ezmûn bi dawî bûn. Ji bo xwendekarên refên 9 û 12`an ku bi rêk û pêk li dibistanan perwerde dibûn, li şûna lidarxistina ezmûnên wekhev, sîstema nirxandinê hat danîn.
Têkildarî nirxandina ezmûnên pergala serbest û giştî, her wiha rêjeya serketina xwendekaran, endamê Navenda Ezmûnan a Herêma Cizîrê Ebdulezîz Berzencî peyivî.
Berzencî got, tevî tecrûbeya yekemîn bû jî wan ezmûnên pergala serbest bi awayekî serketî kirine û got, “Ji bo xwendekarên ku di dibistanan de jî pergala nirxandinê bêhtir dikare rewşa wan a rast binirxîne, di nava wê nirxandinê de jî ezmûn hene.”
‘Divê di 3 branşan de bi ser kevin’
Ebdulezîz Berzencî da zanîn ku pileya xwendekarên pergala serbest ên refa 9`an ji 800`î gava xwendekar 320`an bi dest bixin, bi ser dikevin, refa 12`an jî ji 700`î de ku xwendekarên 280`î bi dest bixin, bi ser dikevin. Wî got, “Di heman demê de xwendekarên ku di 3 branşan de bi ser nekevin, bi bin dikevin. Yên ku di 2 branşan de bi ser nekevin, bi şert heke di wan her du branşan de ji pileyê çaryekekê bibin, bi ser dikevin.”
Li gorî Navenda Ezmûnan a Herêma Cizîrê hejmara xwendekarên ku ezmûnên pergala serbest pêşkêş kirin, 359 bû, ji wan 330 yên refa 12`an bûn, 29 jî refa 9`an bûn. Xwendekarên giştî jî refa 9`an 4 hezar û 649 û refa 12`an jî 2 hezar û 53 bûn.
Li ser rêjeya serketinê ya her du pergalan Berzencî got, “Ji bo xwendekarên nirxandinê rêje ji sedî gihaştiye zêdeyî 85`an, yên pergala serbest jî gihaştiye 45`an.”
Berzencî got: “Di ezmûnên pergala serbest de 3 rewşên xapandinê derketin, ew kes jî ji sala xwe dûr ketin û ew ê nikaribin bikevin ezmûneke din jî. Dimîne heta sala bê.”
Li ser dema ragihandina encamên ezmûnên pergala serbest û ya giştî Ebdulezîz Berzencî got: “Encam amade ne, ew ê di demeke nêz de bên eşkerekirin.”
Desteya Perwerde û Hînkirinê ya Bakur û Rojhilatê Sûriyê, di 13`ê Hezîranê de bi biryarnameyekê ezmûneke din (tekmîlî) ji bo xwendekarên refa 12`an a xwendina serbest ragihand. Ezmûnên wê jî dê di navbera 17-25`ê Tîrmehê de bin.
ANHA/QAMIŞLO