Piştî gefên dagîrkeran tevlêbûna jinên Çerkes, Tirkmen û Kurd

Her ku dewleta Tirkan ya dagirker û çeteyên wê gefan dixwin, bi ruhê seferberiyê ciwan berê xwe didin meclisên leşkerî yên bakur û rojhilatê Sûriyê.

Şervanên bi navê Tesnîm Yaqûb, Agirî Kobanê û Hîem Emîn Mûsa ku ji pêkhateyên Çerkes, Tirmen û Kurd in, di pêvajoya gefxwarina dagirkeran de ji bo parastina xaka xwe tev li Meclisa Leşkerî ya Minbicê bûne. Piştî perwerdeyê niha amade ne ku welatê xwe ji dagirkeran biparêzin.

Tesnîm Yaqûb ku şervaneke Çerkes e, sala borî piştî dewleta Tirk dîsa li dijî herêmên Bakur û Rojhilatê Sûriyê gef xwarin tev li Meclisa Leşkerî ya Minbicê bû. Tesnîm Yaqûb tîne ser ziman ku di nav meclisên leşkerî de hejmara jinên Çerkes kêm e ku ew jî bi israra xwe tev li bûye.

Bandorê li birayên xwe jî dike û ew jî tev lê dibin

Piştî ku şervan Tesnîm Yaqûb, tev lê dibe, 2 birayên wê bi navê Kendal Çerkes, Hesen Yaqûb jî tev li Meclisa Leşkerî ya Minbicê dibin.

Tesnîm Yaqûb dibêje bi tevlêbûna wê re gelek guhertin di jiyana wê de çêbûye û behsa meclisê dike: “Di nava vê meclisa leşkerî de min hemû pêkhate dîtin. Hemû reng di meclisê de hene. Ev cudabûna rengan hev temam dikin. Dema gel jî vê dibîne, ew jî hevgirtî dibe ku zarokên wan di nava vê meclisê de ne. Hevgirtina gel li Minbicê hêzêke xurt ava kiriye. Ji tunebûnê hebûn hat avakirin.”

Bi banga seferberiyê re tev lê bû

Hîem Emîn Mûsa ku ji pêkhateya Tirkmen e, piştî gefên dagirkeran yên îsal tev li Meclisa Leşkerî ya Minbicê bûye. Hîem Mûsa dibêje ji bo azadiyê jinan mîsoger bike û li dijî gefan bi sekneke xurt bisekine, tev lê bûye û van lê zêde dike: “Şervanan bandor li min kir ku ji bo azadî û parastina welatê me şer dikin.

`Bi qasî navê xwe agir bi dijmin bixim`

Agirî Kobanê ku ji Kobanê ye û berê di nav Hêzên Ewlekariya Hundirîn de cih digirt, niha jî wekî hevalên xwe tev li Meclisa Leşkerî ya Minbicê bûye. Agirî Kobanê tîne ser ziman ku li dijî gefên dewleta Tirk a dagirker piştî ku seferberî hat ragihandin, tev li meclisa leşkerî bûye û dibejê: “Ger ez welatê xwe neparêzim dê kî biparêze? Min navê xwe kir Agirî ku bi qasî navê xwe agir bi dijmin bixim. Heya dilopek xwîn bi me re hebe em ê li dijî dagirkeran li ber xwe bidin û nahêlin derbasî axa me bibin. Dagirker dixwazin Minbicê dagir bike ku ji Minbicê êrişî her cihî bike. Lê em nahêlin ev pêk were. Xewnên wan dê tenê di xewnan de bimîne.”

Agirî Kobanê bang li ciwanan kir ku tev li hêzên xwe bibin û li dijî dagirkeran bi yekdestî rabin û got: “Ji bo ku dîsa pêvajoya DAIŞ’ê dubare nebe divê her kes banga seferberiyê pêk bîne.”

ANHA