Hiqûqzan Hesen Misto bikaranîna çekên qedexekirî bi sûcên şer û qirkirinê bi navê kir û diyar kir ku bêdengiya NY cesaretê dide dewleta Tirkan ya dagîrker ku bikaranîna çekên qedexekirî bidomîne.
FacebookTwitterWhatsAppTelegram
Dewleta Tirkan ya dagîrker di êrişên li dijî Herêmên Parastina yên Medyayê yên Başûrê Kurdistanê de, hemû çekên pêşketî bi kar tine, ji wan ên çekên kîmyewî yên qada di navneteweyî de qedexe ne.
Li gorî daneyên dawî yên Navenda Ragihandinê ya HPG`ê, artêşa Tirk a dagirker ji destpêka êrişên Nîsana derbasbûyî ve, 779 caran bi çekên kîmyewî êrişî gerîlayên li Herêmên Parastinê yên Medyayê kiriye.
Têkildarî mijarê hiqûqnas Hesen Misto diyar kir ku di asta cîhanî de peymana Bikaranîna Çekên Kîmyewî 1993`yan hate îmzekirin û 1997`an pêk hat. Ev peyman bi armanca parastina aştî û ewlehiya navneteweyî bû û îşaretê pê dike ku nabe çekên kîmyewî werin bikaranîn.
Hiqûqnas Misto destnîşan kir ku bikaranîna çekên kîmyewî li dijî gelê Başûrê Kurdistanê, tê wateya binpêkirina qanûnên navneteweyî, ji ber ku zirarê digihîne zindî û xwezayê.
Misto bal kişand ser helwesta NY’yê ya têkildarî êrişên dewleta Tirk a dagirker û wiha dewam kir: “Ev bêdengî dihêle careke din van çekên di qada navneteweyî de qedexe ne bi kar bîne. Ger raporên ji Komîteya Rêveber a NY`yê re hatine pêşkêkirin werin piştrastkirin, dikare dewletên van çekan bi kar tînin hişyar bike û dema bersiva hişyariya Sekretêriya Giştî ya NY`yê nede, divê Meclisa Ewlehiyê li gorî benda 7`an a peymana NY`yê hesab bixwaze.”
Hiqûqnas Hesen Misto anî ziman ku bêdengiya NY`yê û rêxistinên hiqûqî yên têkildarî parastina mafên mirovan li berjewendiyên siyasî û aborî yên welatan û aliyên li ser peymana Qedexekirina Bikaranîna Çekên Kîmyewî îmze kirine, vedigere.
ANHA