Mihemed Xanim/Qamişlo
Elî Roj diyar kir ku ji rojnamevan û xebatkarên ragihandinê yên bakur û rojhilatê Sûriyê tê xwestin ku li dijî êrişên dagîrkeriya li ser welat xebata xwe zêde bikin û got, em teqez dibêjin wê îradeya gelê me yê azadîxwaz û têkoşîna rojnamevanên heqîqetê ti carî têk neçe.
Dewleta tirkî di çarçoveya qirkirina gelê Kurd û gelên herêmê de siyaseta xwe ya dijber didomîne. Ev, ji piştgiriya DAIŞ’ê û komên wekî wê, bicihkirina serçeteyên wê li herêmên dagîrkirî, ji dagîrkirina Efrîn, Serê Kaniyê, Girê Spî û guhertina demgorafîk ya li wan herêman, topbarana rojane ya li ser gundên bakur û rojhilatê Sûriyê, mînakên herî zindî yên li ber çavan in. Herwiha hedefkirina welatiyan û rêveberiyên herêmê ku bi balafirên bêmirov li dijî gelê bakur û rojhilatê Sûriyê pêk tine, encama heman siyasetê ye. Ev hemû sûcên li dijî yasa û peymanên navdewletî ne ku dewleta tirkî pêk tîne. Li ser gef û êrişên dewleta tirkî ya dagîrker rojnemevan Kurd Elî Roj ji me re axivî.
’Gef û êrişên dewleta tirkî yên li dijî gelê Kurd ti carî sînordar nebûne’
Roj diyar kir ku êrişên dagîrkeriya tirkî yên ser herêmê bênavber dewam dikin û wiha got: “Ji Şehba heta Tiltemir, Şingal û başûrê Kurdistanê dewleta tirkî êrişan pêk tîne û welatiyan dike amanc. Rojane şehîd û birîndar hene û êrişên dagîrkeriya tirkî bi rengekî berfireh tê meşandin. Gef û êrişên dewleta tirkî yên li dijî gelê Kurd ti carî sînordar nebûne, lêbelê sînor tev derbas kirine. Ev ji kirinên wan yên li dijî mafê mirovan li bakur û rojhilatê Sûriyê û derve ne. Di hundirê sînorê xwe de jî heman kiryran dike. Berî çend rojan kiryarên wan yên li dijî xebatkarên ragihandinê û siyasetmedarên Kurd yên bakurê Kurdistanê rastiya wan ya faşîst eşkere dikirin. Operasyon dan destpêkirin û xistin girtîgehan”
’Guhertina demografîk wê nakokiyên mezin di nava civaka Sûriyê de çêke’
Elî Roj da zanîn ku dagîrkeriya tirkî dixwaze bi hinceta bicihkirina penaberan planên dagîrkeriyê pêk bîne û wiha got: “Dewleta tirkî bi sedhezaran gel ji herêmên dagîrkirî wekî Efrîn, Girê Spî û Serê Kaniyê kocber kirin. Dixwaze guhertina demografîk pêk bîne. Li aliyê din jî kampên niştecihbûnê yên nijadperst li herêmên dagîrkirî ku xelkên wê yên resen bi zorê hatine koçberkirin, ava dike. Niha jî kar dike zêdeyî milyonek koçberên Sûriyê yên li cem xwe, li wan herêmên dagîrkirî li şûna gelên wê yên resen yên bi darê zorê hatîm derxistin, bi cih bike. Ev guhertina demgorafîk eger dewam bike, wê xetereke mezin li ser rewşa mirovî û ewlekariya herêmê çêke. Di heman demê de wê veqetandineke mezin û nakokiyê di nava civaka Sûriyê bi giştî de çêke. Armanca vê dagîrkeriyê jî ew e ku bi siyaseta Osmaniya nû, vegere mîsaqa milî .”
’Hêzên Navneteweyeyî li dû berjewndiyên xwe ne’
Roj bal kişand ser bêdengiya cîhanê ya li hemberî êrişên dagîrkeriya tirkî û wiha dirêjî da axaftina xwe: “Li hemberî êrişên dagîrkeriya tirkî cîhan çavê xwe digire. Hezên Navnetewyeyî li dû berjewendiyên xwe ne. Dizanin ku Tirkiye destekê dide çeteyên DAIŞ’ê. Heta ku DAIŞ li ser sînor bû , Tirkan tiştek nedikir û destek didan wan. Herêmên dagîrkirî ji bo çeteyên DAIŞ’ê herêmên herî ewle ne. Çeteyan xwe li van herêman bi cih kirine û ji van herêman êrişî bakur û rojhilatê Sûriyê dikin. Her kes dizane ku bûyera zindana Sîna’a ya Hesekê destê Tirkan tê de hebû. Herwiha kampa Holê rojane kuştin tê de çêdibe û ev jî bi destê Tirkan e. Siyaseta Tirkiyê ya qirêj ji her kesî re eşkere ye. Lê disa jî her kesî çav û guhê xwe girtiye.”
’Emê li her cihî û her dem dengê gelê xwe bin’
Rojnemevanê Kurd Elî Roj soza şopandina riya rojnemevanên li ser xeta heqîqetê şehîd bûyîn da û axaftina xwe wiha qedand: “Em soz didin hevalên xwe yên rojnamevan yên ji bo veguhstina rastiya gelê me di her şert û mercan de têkoşîn kirîn û canê xwe feda kirîn, emê xeta wan bidomînin û bibin deng û îradeya rast ya civakê. Li ser vî esasî em bang li rojnamevan, xebatkar û saziyên ragihandinê, hêzên şoreşger û demokratîk yên cîhanê dikin ku bi yek helwêstê li dijî êrişên dewleta tirkî li kêleka doza gelê me bisekinin.”