Navenda Nûçeyan
Endama Meclisa Rêvber ya PYD’ê Foza Yûsiv teqez kir ku Partiya Yekîtiya Demokratîk li gorî her qonaxê xwe nû dike û got, ji bo parastina hebûna gelan, lidarxistina kongreyê di vê qonaxa hesas de ji bo gelê herêmê û PYD’ê pir girîng e. Herwiha peyama kongreyê ya herî girîng ew bû ku wê bi Şerê Gelê Şoreşgerî ev pêvajo bi ser bikeve.”
Bi dirûşma “Bi ruhê şerê gel ê şoreşgerî, em ê dagirkeriyê têk bibin û Sûriyeya demokratîk ava bikin”, li gorî rêziknameya partiyê ku her du salan kongre bê lidarxistin, 19 Hezîranê 9’emîn Kongreya Partiya Yekitiya Demokratîk (PYD) li bajarê Hesekê dest pê kir. Li gorî komîteya amadekar, 700 delege ji endam, nivîsgeh û nûnerên partiyê li Bakur û Rojhilatê Sûriye, Kurdistan û Ewropayê tevli kongreyê bûne. Têkldarî vê mijarê Endama Meclisa Rêvber a Partiya Yekitiya Demokratîk PYD’ê Foza Yûsif ji ajansa JINHA re axivî .
“Salên li pêşiya gelê herêmê salên çarenûsê ne”
Foza Yûsif da zanîn ku salên li pêşiya gelê herêmê salên çarenûsê ne û wiha domand: “ji bo ku hebûna gelan were parastin di vê qonaxa hesas de kongreya 9‘mîn hat lidarxistin. Salên li pêşiya gelê herêmê salên çarenûsê ne, ji ber ku hemû peymanên di sedsaliya derbasbûyî de çêbûn di van salan de careke din wê xwe nû bikin. Lewma wekî gelê Kurd û hemû gelên herêmê pêwîst e bi amadekerî, plan û bi stratîjiyek xurt em derbasî pêvajoyê bibin. Ji bo wê kongreya PYD’ê di warê parastin, civakî, Rêveberiya Xweser, ji bo pirsgirkên civakê û ji bo azadiya Rêber Apo bi her awayî wê xwe bigihîjîne biryarên gelekî girîng ku em di salên pêşiya xwe de bi têkoşîn, berxwedan û seferberiyek mezin pêşwazî bikin.”
“PYD’ê paradîgmaya Neteweya Demokratîk bingeh digre”
Foza Yûsif bibîr xist ku Partiya Yekitiya Demokratîk di şoreşa Rojava de pêşengiyek mezin kir û wiha dewamî da axaftina xwe: “Gelê Kurd hêzek mezin ava kir di herêma Rojhilata Navîn de û bûye hêzeke ku dikare di nexşeya siyasî de cih bigre û bi bandor bike. Rola partiyên siyasî gelek girîng e ji bo pêşvebirin û pêşengiya vê pêvajoyê. PYD’ê heta niha pêşengî û rolek pir mezin û girîng di Şoreşa Rojava de lîst. PYD’ê berpirsyariya çareserkirina pirsgirêka Kurd li Rojavayê Kurdistan girtiye ser xwe û bi erkên xwe yên neteweyî li hemberî her sê aliyên Kurdistanê dirabe û di warê herêmî û cîhanî de bi paradîgmaya Neteweya Demokratîk, ekelojî û azadiya jinan bandorek mezin li ser tevahî cîhanê dike.”