Ji ber adetan û hin sedemên din yên bi aloziya Sûriyê re derketine weke zewicandina zarokan, koçberî û rewşa aborî ya xirab, gelek kes ji mafê xwendin û nivîsê bêpar man. Ji ber wê Abîr û hevalên wê û bi dehan jinên din berê xwe didin Navenda Çandê ya Helebê da ku fêrî xwendin û nivîs; bibin.
FacebookTwitterWhatsAppTelegram
Abîr Sewa (30) behsa xewna xwe ya fêrbûna xwendin û nivîsandinê dike, ji ber ku ew ê bi vê rêya zanîn û çandê nas bike.
Abîr û bi dehan hevalên xwe re diçin navenda çalakiyan a Malbenda Çandê ya Helebê ku li ser rêya rojhilatê taxa Şêxmeqsûd e da ku sûdê ji perwerdeyên fêrkirina xwendin û nivîsandinê yên bi zimanên kurdî û erebî wergirin.
Abîr der barê mijarê de anî ziman ku wê ji zaroktî ve dixwest xwendina xwe dewam bike, lê ji ber ku di temenê biçûk de ew dane zewicandin, nekarî xewna xwe dewam bike. Niha bi hezkirin û coşeke mezin li xwendinê vedigere.
Abîr diyar kir ku xwendin çeka mirovên biaqil e, lewma divê hemû jinên wekî wê ji mafê xwendinê bê par mane, li xwendinê vegerin ji ber ku mafekî rewa ye.
Hevseroka Malbenda Çandê ya Helebê Leyla Xalid diyar kir ku armanca sereke ji vekirina dewreyên fêrkirina xwendin û nivîsandinê sivikkirina barên şer ê li welat e, her wiha da ku hin têgehên di civatê de şaş hatine fêmkirin, werin zelalkirin û sererastkirin.
Leyla destnîşan kir ku herî zêde zarokên ji ber koçberî û rewşa aborî ji mafên xwendinê bê par mane, sûdê ji vê însiyatîfê werdigirin, her wiha jinên di nava dab û nêrîtên şaş de xwendina xwe dewam nekirine.
Leyla Xalid da zanîn ku di halê hazir de bi dehan kes sûdê ji vê însiyatîfa beriya çend rojan hate destpêkirin, werdigirin. Amadekariya pêşwazîkirina hejmareke din jî tê kirin, ji ber ku gelek nav hatine tomarkirin.
Leyla Xalid diyar kir ku ji karên vê malbendê ye ku asta fikrî bi pêş bixe û li hemberî nezanînê bisekine, vê yekê jî bi rêya vekirina perwerdeyên fêrkirina xwendin û nivîsandinê derbas dike.
Leyla da zanîn ku wan xwest karker jî xwe fêr bikin, ji ber ku ew hêza dînamîk a civakê ne, lê ji ber ku piraniya wan malbatên xwe xwedî dikin, tenê rojek ji wan re hate veqetandin.
Hevseroka Malbenda Çandê ya Helebê di dawiyê de got wane bi zimanên kurdî û erebî têne dayîn.
ANHA
