Hunermend Casmî Saz ji ber vexwendina hunermendekî faşîst yê Tirk ji bo Dihokê, rexne li berpirsên Herêma Kurdistanê kirin û got, dewleta Tirkan êrişê huner, çand, wêje û rewşenbiriya Kurdan dike.
Şeva 7’ê Hezîranê li Zanîngeha Emerîka ya Dihokê ku Serokwezîrê Herêma Kurdistanê Mesrûr Barzanî malûvaniya wê dikir, bi amadebûna Serokê Herêma Kurdistanê Nêçîrvan Barzanî, şahiya mezûniyeta xwendekaran pêk hat. Ji bo şahiyê li ser vexwendina Serokwezîrê Herêma Kurdistanê Mesrûr Barzanî stranbêjî Tirk ê faşîst ê bi navê Mistefa Cecelî jî amade bû.
Di derbarê mijarê de Hunermend Casmî Saz got: “Bi salane dewleta Tirk êrişên nerewa dike ser gelê Kurd. Bi taybetî êrişê ser Qendîl û Rojavayê Kurdistanê dike. Di heman demê de jî êrişê ser huner, çand, wêje û rewşenbiriya gelê me dike. Vê yekê jî bi rêya weşandina rêze filman dike. Di rêze filmên xwe de sivgahî bi navê Kurdan dikin.”
Casmî Saz da zanîn li Tirkiyeyê dema hunermendek Kurd sitranek dibêje bi hezaran kes êrişê ser dikin, yan jî tên girtin, lê berpirsên hikûmeta Herêmê jî pêşwaziyê li hunermendên Tirk dikin.
Di dewamê de Hunermend Casmî Saz da zanîn di salên borî de berpirsên Herêmê Îbrahîm Tatlises anîn li Herêma Kurdistanê avahî li ser navê wî qeyd kirin û li nava Kurdistanê di gerandin, niha jî hunermendek din ê Tirk anîne nava zanîngehê û dixwazin bi vê rêyê hunera gelê Kurd winda bikin.
Tê gotin ku di beramberî hatina hunermendê Tirk ji bo şahiya zanîngehê de 120 hezar dolar hatiye dayîn. Ji bo piştrastkirina vê yekê sê rojin pirs ji Zanîngeha Amerîkî a li Dihokê tê kirin, lê bersiva vê pirsê nade.
ROJNEWS