Embarên genim yên Rovî û Çelebiyê yên herêma Firatê heta niha ser 14 hezar tonî re genim girtine. Rêveberên girtinê diyar kirin ku kalîteya berhemê baş e û bihayê wê li gorî pergala astan e ku Rêveberiya Xweser diyar kiriye.
FacebookTwitterWhatsAppTelegram
Ji 25’ê Gulana borî ve Şirîkeya Pêşxistina Civaka Çandiniyê ya herêma Firatê berhemên genim ji cotkaran di embarên Rovî yên başûrê Kobanê û yên Çelebiyê yên başûrê rojhilatê Kobanê, werdigire. Heta ku her du embar tije bibin wê embara Sirînê jî were dagirtin.
Li gor rêveberên wergirtina genim, heta niha rêjeya genim di embarên Rovî û Çelebiyê de bêhtirî 14 hezar ton e.
Rêveberê wergirtinê genim di embarên Rovî de, Mihemed Ebid got, miqdara ku gihiştiye embaran li gor par baş e
Tê zanîn ku ev du sal in Bakur û Rojhilatê Sûriyê ji ber kêmbûna baranê rastî hişkesaliyê tê. He wiha rûberek a zeviyên genim û ceh şewitîn.
Rêveberiya Xweser ji bo kirîna her kîloyek genim 2 hezar 200 lîreyên sûrî diyar kir
Mihemed Şêxo yê ku genim bi erebeya xwe dibe embarên Rovî destnîşan kir ku li gor hişkesaliya ku îsal li herêmê xistiye tevgera veguhastina genim baş e.
Cotkarê bi navê Remedan Hîlal ê ku berhema xwe anîbû embaran razîbûna xwe ya li ser bihaya ku ji aliyê Rêveberiya Xweser ve hatiye diyarkirin, nîşan da û got, ev yek dê cotkaran teşwîq bike.
Her wiha Rêveberiya Xweser di 2’ê vê mehê de biryarek derxist ku tê de veguhastina genim bê destûreke fermî ji Şirîketa Pêşxistina Civaka Çandiniyê qedexe kir û bacek ji kesên ku li gor wê biryarê nemeşe re diyar kir.
‘Embarên me amade ne û rêbaza wergirtina genim baş bi rê ve diçe’
Şirîketa Pêşxistina Civaka Çandiniyê ya herêma Firatê genim ji bo çar astan dabeş kir û berheman li gor wan astan werdigire ku bihaya asta çaremîn ji kêmtirî 2 hezar lîreyên sûrî nabe.
Hevseroka Şirîketa Pêşxistina Civaka Çandiniyê ya herêma Firatê, Gulistan Şêx Ehmed wiha anî ziman: “Piştî me embaran paqij kirin, me biryara wergirtina wî da û heta niha wergirtin berdewam e.”
Embarên Rovî di sala borî de 37 hezar ton genim wergirt. Ev miqdar hindik hatibû dîtin ji ber ku pêwîstiya herêma Firatê salane bi bêhtirî 60 hezar ton heye.
Di herêma Firatê de çar embarên genim hene (Çelebiyê, Rovî, Sirîn).
ANHA
