Kombûna Jinan ya Zenûbya bi dirûşma “Bi rêxistin û perwerdeyê emê şoreşa civakî pêk bînin”, pêngava hişyarkirinê ragihand.
Kombûna Jinan a Zenûbya bi beşdariya bi dehan endamên saziyên sivîl û leşkerî yên Reqayê, bi daxuyaniyekê pêngaveke civînên giştî bi armanca danasîna pirsgirêkên civakî yên ku rastî jinan tên û çareseriyên wan, ragihand.
Berdevka Kombûnê Xûd Îsa daxuyanî xwend ku tê de behsa pirsgirêkên civakî yên rastî jinan tên, hat kirin; “Zêdebûna rêjeya xwekuştinê, zewicandina zarokan, pirjinî, şerê taybet û tinebûna wekheviyê, tundiya li ser jinan, zextên derûnî, bikaranîna madeyên hişbirê û kevneşopiyên şaş”.
Hate gotin ku ev pirsgirêk civakê ber tu tunebûnê ve dibe.
Her wiha di daxuyaniyê de çareserî ji wan pirsgirêkan re hatin destnîşankirin û wiha hate gotin: “Divê em ji bo perwerdekirina civakê bixebitin û giraniyê bidin rola malbat û dibistanê di perwerdeyê de, rê nedin zewicandina zarokan û xelkê teşwîqî fêrbûna nivîsandin û xwendinê bikin.”
Kombûna Jinan a Zenûbya di daxuyaniya xwe de ragihand ku ew ê bi dirûşmeya “Bi rêxistin û perwerdeyê em ê şoreşa civakî pêk bînin”, dest bi pêngava civînên giştî bikin ku dê heta 9’ê Tîrmeha bê bidome.
Li gor daxuyaniyê, pêngav dê li her çar herêmên rêveberiyên sivîl li Reqa, Tebqa, Minbic û Dêrazorê were lidarxistin.
ANHA
