Şaredariya Gel ya Qamişlo projeyên xwe yên di plansaziya sala 2022’yan de didomîne. Şaredarî li taxên rojava û rojhilat sererastkirina riyan didomîne.
FacebookTwitterWhatsAppTelegram
Şaredariya Gel a bajarê Qamişlo dest bi projeyên xwe yên herî girîng ên îsal kirin. Ji wan projeyan sererastkirina rêyan û çareserkirina pirsgirêkên kanalîzasyonê ne. Ji taxa Hilêliyê ya li rojavayê bajar heta taxên rojhilatê bajar ev proje tên pêkanîn.
Ji 17’ê Gulanê ve şaredarî rêyên taxa Cimaya ya rojhilatê bajar bi kevirên şikandî radixe. Her wiha ji 1’ê Hezîranê ve rêyên hin kolanên taxa Hilêliyê qîr dike. Ev xebat hîna dewam dike.
Endamê rêveber ê beşa lêkolînên hunerî ya Şaredariya Gel a Qamişlo Hesen Hisên diyar kir ku ji plansaziyên şaredariyê, dê rê bi kevirên hur werin raxistin, piştre dê werin qîrkirin.
Hisên got: “Me ji komîna Şehîd Mizgîn a taxa Hilêliyê ya rojavayê Dibistana Seade dest pê kir. Her wiha me projeya kanalîzasyonê ji komîna Şehîd Hacî dest pê kir. Xebatên qîrkirinê jî tenê li kolana Hîzam pêk hat ku di sala borî de hatibû kirin.”
Plan û projeyên salane yên şaredariyê
Hesen Hisên got:” Di plana me ya îsal de projeyeke mezin a zifitkirinê heye, bi 14 hezar mîtrekab dê tevahî taxên Qamişlo bên zifitkirin, her wiha projeya kanên qûmê û kevirên şikandî di plansaziya wan de ye.
Plana zifitkirina Qamişlo
Plana zifitkirinê li ser van taxên Qamişlo tê belavkirin:”Taxa Hilêliya Rojava, taxa Kornîş û taxa Hilko” li aliyê Rojhilat jî “Taxa Cûdî, Cimayê, Um El-Firsan, Erebewiyê, Pîşesazî û Zeytûniyê.”
Her wiha kar li ser zifitkirina rêyên giştî û şaxî jî tê kirin weke rêya Ehmed Şewqî ya sereke, ku li ser wê gele gilî û gazin hatibû kirin.
Hisên got:” Piraniya giliyên ku di çend salên borî de dihatin şaredariyê, ji bo zifitkirin û Bîtomîn bû. Me madeya Bîtomîn ji mecbela nû ya li bajarê Hesekê ku par hatibû çêkirin peyda kir. Em hêvî dikin ku zifta vê carê ji salên berê baştir be.”
Hesen Hisên ev tişt jî anî ziman:”Weke tê zanîn divê rojeke sax an kêmî rojeyekê, li gor asta başbûna ziftê, divê erebeyên sivik û giran li ser ziftê nemeşin.
Erebeyên giran ziyan digihînin ziftê, çareseriya baş, dîtina rêyên din ji bo wan erebeyan ku ew rê li derveyî bajaran bê çêkirin.
ANHA
