​​​​​​​KJAR: Di nava 3 salan de 410 jin hatin kuştin

Komîteya Lêkolînê KJAR’ê derbarê kuştina jinan ya li Rojhialtê Kurdistanê de raporek weşand. Di raporê de hat gotin ku di nava 3 salên dawî de 410 jin hatine kuştin.

Komîteya Lêkolînê ya Komelga Jinên Azad yên Rojhilatê Kurdistanê (KJAR) der barê qetilkirina jinan a li Rojhilatê Kurdistanê de raporek belav kir. KJAR’ê di raporê de diyar kir ku di 3 salên dawî de li Rojhilatê Kurdistanê 410 jin hatin qetilkirin. KJAR’ê anî ziman ku di destpêka sala 2022’an de jî 7 jin hatine qetilkirin.

Komîteya Lêkolînê ya KJAR‘ê ragihand ku bi rêya weşandina vê raporê hewil didin ku aliyê tarî û xerab ê hişmendiya mêrsalariyê li gel qanûnê eşkere bikin û di heman demê de rêya çareseriyê ji bo rewşa heye bibînin.

Li gorî rapora KJAR’ê li herêmên cuda yên Rojhilatê Kurdistanê di nava sê salên borî de heta destpêka îsal wiha ye:

 “Di sala 2019’an de 133 jinan dawî li jiyana xwe anîne û herî kêm jî 33 jin ji aliyê endamên malbatê û xizmên xwe ve hatine qetilkirin. 5 ji van bi îdiaya namûsê hatine qetilkirin.

Di sala 2020’an de, li gorî rapora Tora Mafên Mirovan, 94 jin li herêmên Rojhilatê Kurdistanê dawî li jiyana xwe anîne ku 33 kes ji van temenê wan li jêr 18 saliyê bûn. 18 jinên din ji aliyê endamekî malbatê weke bira, bav an hevjîn bi hinceta namûsê yan jî pirsgirêka civakî hatine qetilkirin.

Di sala 2021’an de, herî kêm 94 jinan dawî li jiyana xwe anîne ku ji van 15 kes kêmî 18 saliyê ne. 18 jin bi hinceta namûsê hatine qetilkirin, 17 jin jî bi destê hevjînê xwe hatine qetilkirin. 3 jin jî ji aliyê hevjînên xwe yên berê ve hatine qetilkirin.

Li gorî raporê, destpêka sala 2022’yan, 7 jin li Rojhilatê Kurdistanê bi hincetên cuda hatine qetilkirin.”

Di dawiya raporê KJAR’ê wiha got: “Em weke KJAR’ê hewl didin ku rêya çareseriyê ji bo rewşa xerab a jinên herêmên Rojhilatê Kurdistanê bibînin. Dixwazin hemû jinan perwerde bikin û peywendiyan li gel jinan bikin. Daxwazê ji jinan dikin ku peywendiyê bi me re danin.“

ANHA