Yekîtiya gelên herêmê serkeftinê misoger dike

Mihemed Xanim/Qamişlo

Bi armanca şkandina vîna gelên herêmê û têkbirina projeya Biratiya Gelan, dewleta tirkî ya dagîrker êrişên xwe yên ser bakur û rojhilatê Sûriyê didomîne. Di nava bêdengiya cîhanê de, dagîrkerî û çeteyên wê, gefên xwe li ser herêmê zêde dikin û ji bo qirkirina gelên herêmê bi hêzên navdewletî re di nava bazarê de ne. Li ser vê mijarê siyasetmedar û endamê  Desteya Disiplînê ya PYD’ê Luqman Caro ji me re axivî.

‘Dewleta tirkî ya faşîst ewleyiya herêmê ji xwe re xeter dibîne’

Caro diyar kir ku dewleta tirkî ya dagîrker, destkeftiyên gelê Kurd wek xeter li ser desthilatdariya xwe dibîne û axaftina xwe wiha domand: “Hikumetên Tirkiyê tevan erîşên ser gelê Kurd ji xwe re kirine çand û bi wan êrişan pirsgirêkên xwe yên hundir vedişêrin. Bi destpêkirina aloziya li Sûriyê re, gelê Kurd sîstemeke demokratîk ava kir. Kurdan pêşengiya projeya Neteweya Demokratîk kir û bi awayekî serkeftî herêm bi rê ve birin. Projeya Neteweya Demokratîk bû bingehê rêxistinbûn û azadiya gelên herêmê. Dema dagîrkeriya tirkî dît ku ev projeya demokratîk pêş dikeve û wê çareseriyê bi xwe re bîne seranserê herêmê, li ser xwe xeter dît. Lewra dixwaze ji aloziya Sûriyê sûdê bigre û amancên xwe yên dagîrkiriyê pêk bîne. Dewleta tirkî ya faşîst li kû derê hebûna azadiya Kurdan hebe, êrişî wê derê dike.”

‘Rûsya û Amrîka di sûcên ku dagîrkeriya tirkî dike de hevkar in’

Caro da xuyakirin ku dewletên wekî Rûsya û Amêrka, ji bo berjewendiyên xwe beşdarî krîza Sûriyê bûn û axaftina xwe wiha domand: “Dagîrkeriya tirkî her dem hewl dide ji pirsgirêkên Rojhilata Navî û cîhanê sûdê bigre. Li ser nakokiyên di navbera welatan de dilîze û amancên xwe pêk tîne. Ji ber ku cih û erdîngariya Tirkiyê ji bo dewletên rojavayî girîng e, her kes dixwaze bi riya bazarên ser Kurdan aramncên xwe bi dest bixe. Dagîrkeriya tirkî li ber çavê tevayiya cîhanê komkojiyan dike. Rûsya û Amrîka qaşo li herêmê garantor in lê xwe bêdeng dikin. Dîroka her du dewletan ji her kesî re diyar e. Ji bo berjewendiyên xwe, çi ji destê wan tê dikin. Ev her du hêz ji gelên azadîxwaz re dijmin in.”

‘Çewisandina vîna azad e armanca dagîrkeriyê’

Caro da zanîn ku armanca êrişên dagîrkeriya tirkî yên ser bakur û rojhilatê Sûriyê, têkbirina projeya Biratiya Gelan e û axaftina xwe wiha domand: “Tirkiye dixwaze xeta demokrasî û azadiyê tine bike. Dagîrkerî projeya Neteweya Demokratîk li ser xwe xeter dibîne û bi riya bicihkirina malbatên çeteyan li xakên dagîrkirî, dixwaze gelên herêmê yên resen tine bike û ji cîhanê re bibêje ku jimara Kurdan li herêmê kêm e. Projeya xwe ya guhertina demografîk bi her şêwazî dewam dike. Herwiha dewleta tirkî ya dagîrker dixwaze bi êrişan, îradeya gel bişkîne. Dagîrkerî bi êrişên xwe yên ser sivîlan, polîtîkaya xwe ya qirkirinê didomîne. Siyasetên wê yên dagîrkeriyê li tevayiya qadan têk diçû, ji ber wê bi awayekî hovane êrişî Rêveberiya Xweser ya bakur û rojhilatê Sûriyê dike”

‘Yekîtya gelên herêmê wê serkeftinê misoger bike’

Siyasetmedar û endamê Desteya Disiplînê yê Partiyya Yekîtiya Demokratîk (PYD) Luqman Caro da zanîn ku yekîtiya gelên herêmê wê planên dagîrkeran bêbandor bike û axaftina xwe wiha qedand: “Di vê pêvajoyê de ya herî girîng birêxistinbûn e. Pêwîst e gelên herêmê xwe bi rêxistin bikin û li derdora rêveberiya xwe bibin destek. Proje û fikrê Neteweya Demokratîk, ji gelên Rojhilata Navî re xelasiya ji dagîrkerî û serdestiyê ye. Ji ber wê divê gelên herêmê li gorî wê xwe pêş bixin û nirxên hatine bidestxistin biparêzin. Ji her demê zêdetir pêwîstiya  gelên herêmê bi yekîtiyê heye.