Komîteya Tenduristiyê ya Reqa têkildarî nexweşiya iltîhaba çermê mejî bang kir

Komîteya Tenduristiyê ya Meclisa Sivîl ya Reqa di çend rojên dawî de nêzî 400 rewşên nexweşiya iltîhaba çermê mejî (Sehaye) tomar kiribû. Endamê komîteyê Ebûd El-Bidêwî bang li welatiyan kir ku li gorî tedbîrên xweparastinê tev bigerin.

Di demên dawîn de li bajarê Reqayê û gundewarê wê nexweşiya iltîhaba çermê mejî (Sehaye) belav bû, nexasim di nava zarokên kêmî deh saliyê de.

Têkildarî mijarê endamê Komîteya Tenduristiyê ya Meclisa Sivîl a Reqayê Ebûd El-Bidêwî ji ajansa me re axivî û anî ziman ku di demên dawîn de nexweşiya iltîhaba çermê mejî (Sehaye) li bajarê Reqayê belav bûye.

El-Bidêwî da zanîn ku beriya niha Komîteya Tenduristiyê ya Meclisa Sivîl a Reqa 380 rewşên vê nexweşiyê tomar kiribû, piraniya wan zarokên kêmî deh saliyê bûn.

El-Bidêwî destnîşan kir ku ji ber guhertina avhewayê yê vê dawiyê li herêmê ev nexweşî belav bûye.

El-Bidêwî diyar kir ku nexweşiya îltîhaba çermê mejî (Sehaye) zêde ne metirsîdar e û dermanê wê heye û wiha dewam kir: “Lê divê nexweş 15 rojan di bin kontrolê de be ku bi temamî baş bibe. Ger germahiya laşê zarokan bilind bû, serêşî çêbû yan jî laşê wan tevzî divê serî li navendên tenduristiyê yan jî doktorekî bidin.”

El-Bidêwî bang li gelê Reqa û gundewarê wê kir ku li gorî tedbîrên xweparastinê tevbigerin, destên xwe bişon û li paqijiya zarokan hayedar bin. Her wiha destnîşan kir ku divê dûrî kesên nexweş bikevin û derziyên taybet bistînin. Ji ber ku ev nexweşî bi rêya oksejînê û bikaranîna alavên nexweşan tê vegirtin.

Têkildarî hewldanên Komîteya Tenduristiyê ji bo pêşîlêgirtina vê nexweşiyê, El-Bidêwî got, “di dema niha de Rêxistina Tenduristiyê ya Cîhanê (WHO) tîmek erkdar kiriye da ku navên pêketiyên vê nexweşiyê li Reqa û gundewarê wê tomar bike ku hîn zêdetir nexweşî belav nebe.”

ANHA