Nerazîbûnên li hemberî êrişên dewleta Tirkan û hevkariya PDK’ê ya bi dewleta Tirkan re, dewam dikin.
Nerazîbûnên li hemberî êrişên dewleta Tirkan û hevkariya PDK’ê ya bi dewleta Tirkan re, dewam dikin. Nivîskar û Helbestvanê Kakeyî, Xelef Seîd ê ku bi navê Cotyar Kakeyî tê naskirin, derbarê êrişên dewleta Tirk ên ji bo dagirkirina Başûrê Kurdistanê de axivî.
Cotyar Kakeyî got, gelekî giring e niha Kurd li beramberî dijmin xwediyê yek helwêst û siyasetê bin: “Dewleta Tirk hewl dide Kurdistanê bixe rewşeke xeter. Tişta ku dewleta Tirk niha li Behdînanê dike, gelekî xirabtir e ji enfal û karesatên di dema Sedam Hisên de bi serê me de hatî.”
Cotyar Kakeyî wekî din got, dîrokê piştrast kiriye ku dagirker bi girtina gir û çiyayekî tenê ranawestin û wiha dewam kir: “Niha dewleta Tirk dixwaze li Avaşîn û Metînayê cihên stratejîk bigire, heger bikare van cihan dagir bike, bê guman wê piştre dest bi dagirkirina Hewlêr, Silêmanî û Kerkûkê jî bike. Ji bona wê, ev şerê man û nemanê ye. Divê Kurd li dijî dagirkeriya Tirk yek bin û rabin.”
‘Armanc tinekirina Kurd û Kurdistanê ye’
Nivîskar Cotyar Kakeyî daxwaz ji Serokatiya Herêma Kurdistanê kir da ku li dijî dagirkeriya dewleta Tirk erka xwe pêk bîne: “Divê serokê Herêmê rê nede ti hêzeke Kurdî xiyanetê bike û hevkariya dagirkeriya Tirk bike. Divê hewl bide bi rêya Iraqê rê li pêşiya dewleta Tirk bigire û rêkarên yasayî li beramberî Tirkiyeyê bigire.”
Di dawiyê de jî Cotyar Kakeyî got, “Pêwîst e li dijî dewleta Tirk, ji bo piştgiriya gerîla xwepêşandan û çalakiyên mezin werin lidarxistin. Heger dijmin welatê me dagir kir, em ê hemû zererê jê bibînin. Dijmin ti cudahiyê naxe navbera Bozî, Kakeyî, Misilman û Mesîhiyan. Hemû Kurd in û armanca dijmin tinekirina Kurd û Kurdistanê ye.”
ROJNEWS/ÇEMÇEMAL