Li Tirkiyê bi sondxwarina Erdogan re rejîm bi fermî guherî. Guhertina rejîmê û derxistina 19 hezar kesî ji kar, cihekî berfireh di çapemeniya Ewropayê de girt.
Li Tirkiyê, piştî ku Serokê Giştî yê AKP’ê li meclîsê sond xwar, rejîm bi rengekî fermî guherî. Sîstema hikumetê ku ji Serokwezîr û wezîran pêk tê wê qediya û li şûna wê Sîstema Hikumetê ya Serokkomariyê dest pê kir. Bi vî rengî rejîma yekzilamî li Tirkiyê bi fermî dest bi kar kir.
Beriya ku Erdogan li meclîsê sond bixwe, hikumeta Tirk “Biryarnameya Rewşa Awarte ya dawî” weşand. Bi rêya vê biryarnameyê re 18 hezar û 632 kes ji kar hatin avêtin, 12 komele, 3 rojname û qenaleke televîzyonê hatin girtin. Vê rewşê bi rengê “rejîma Erdogan xurt dibe” cihê xwe di çapemeniya Ewropayê de girt.
KOMARA DERXISTINA JI KAR
Yek ji rojnameyên sereke yên Elmanyayê “Frankfûrter Allgemîne Zeîtûng” (FAZ) bi sernavê “Tirkiya Erdogan-Komara derxistina ji kar” cih da guhertinên ku Erdogan di nava rejîmê de kiriye. Di şîrove-nûçeya rojnameyê de ku bi navê nûçegihanê rojnameyê yê li Atînayê Mîchael Martens ve hate amadekirin, hate destnîşankirin ku piştî biryarnameya dawî wê Erdogan êdî karibe bi fermanê her guhertinê li gorî dilê xwe bike.
Deûtsche Welle jî bi sernavê “Erdogan sûltanê destpêkê yê Tirkiyeya nûjen e” cih da mijarê. Pisporên ku li ser mijarê ji Deûtsche Welle re axivîn diyar kirin ku sîstema serokatiyê ya li Tirkiyê nabe ku bi sîstemên li Fransa û DYA re bê nirxandin û erkên ketine destê Erdogan yek bi yek raxistin pêş çavan.
QRALÊ ROJÊ YÊ TIRK
Yek ji rojnameyên sereke yên Awûstûryayê Dîe Presse jî li ser xurtbûna rejîma Erdogan û biryarnameyên beriya wê hatin weşandin, nûçe-analîzek weşand. Rojnameyê gotina, “Qralê rojê” ku ji bo qralê Fransayê Lûdwîg ê 14. dihate gotin, ji bo Erdogan bi kar anî. Rojnameyê işaret bi bûyerên li Tirkiyê diqewimin kir û destnîşan kir ku Erdogan hemû erk xistiye nava destê xwe û bûye “qralê rojê yê Tirk”.
Erdogan wê êdî li gorî dilê xwe bike
