Zilm û hovîtiya leşker û çeteyên dagirker yên Tirk li Efrînê her diçe zêde dibe. Dagirker welatiya direvînin û êşkencê li wan dikin û ji bo berdanê jî bi hezaran dolar ji wan dixwazin. Dagirkeran bi ser gundê Gobeka ya Efrînê de girtin û 4 welatiyên din jî revandin.
Artêşa Tirk a dagirker û çeteyên wê, piştî bi ser gundê Gobekê yê navçeya Mabata ya Efrînê de girtin, dest danîn ser hemû navgînên ragihandinê yên gel û 4 welatî revandin.
Li gorî agahiyên ku gundiyên Gobekê dan ANHA’yê, çeteyên Lîwa El-Şemal, El-Cebhe El-Şamiye û Ehrar El-Şerqiya roja7’ê Tîrmehê 4 welatiyên ji gund revandine. Li gorî agahiyan navê kesên revandî wiha ye: Emîr Mistefa bin Mihemed bin Nûr (20), Gilgil Hemû bin Menan (55), Mihemed Hesen bin Abidîn (30) û Xebat Şahîn bin Mustefa (31).
Çavkaniyan diyar kir ku welatiyên hatine revandin ber bi cihekî nediyar ve hatine birin.
Her wiha hate ragihandin ku piştî leşker û çeteyên dewleta Tirk ketine gund, êşkence li hemû ciwanên gund kirine, mal û milkên welatiyan talan kirine û gef xwarine ku tu kes di derbarê bûyerê de agahî nede, parve neke.
