Piştî ku DAIŞ’ê bajarê Reqayê dagir kir zilm û wehşeta ku nehatiye dîtin li dijî gelê bajêr pêk anî. Şervanên QSD’ê jî piştî ku Reqa rizgar kir şopên wehşeta çeteyan yek bi yek derdikevin holê. DAIŞ’ê bi sedan welatiyên bê guneh qetil kir. Heta niha Hezar 238 cenazeyên ku nasnameyên wan nehatine hînbûn ji gorên komî hatine derxistin.
Bi hezaran welatiyên sivîl ên herêma Reqayê bi destên çeteyên DAIŞ’ê hatine kuştin û di gorên komî de hatin binaxkirin. Ji dema ku Reqa hatiye rizgarkirin ve, Yekîneya Bersivdariya Yekemîn heta niha hezar û 238 cenaze ku nasnameyên wan nehatine naskirin dîtin û li goristanê spartin axê.
Bi destpêkirina pêngava Xezeba Firatê re, Yekîneya Bersivdariya Yekemîn hat avakirin. Yekîneyê ji destpêka hatiye avakirin ve bi awayekî rêk û pêk xebatên xwe dimeşîne.
Yekîne ji 4 endaman pêk dihat û bi dilxwazî xebatên xwe li gundewarên Reqayê birêve dibir. Bi pêşveçûn û berfirehbûna serweriya şervanên Hêzên Sûriya Demokratîk (QSD) re yekîneyê jî kar û xebatên xwe berfirehtir kirin. Piştî ku bajarê Reqayê hate rizgarkirin hejmara endamên yekîneyê jî zêde bû û gihişt 40 endaman. Di nava endamên yekîneyê de 4 bijîşk hene. Peywira sereke ya vê yekîneyê ew e ku cenazeyên welatiyên sivîl ku çeteyên DAIŞ’ê bê ser û ber li herêmê binax kirine, derxe û bi awayekî guncaw li goristanan bispêre axê.
Yekîneyê di bajarê Reqayê de 4 gorên komî dîtin, gora Parka Lawiran, gora El-Reşîd a li paş dadgeha kevn a bajêr û heta niha 600 cenaze li van goran hatine vedîtin û belgekirin. Li gora Panorama û gora Bexdayê jî 500 cenaze hatine dîtin û belgekirin.
HÊJMARA CENAZEYAN NAYÊ ZANÎN
Çeteyên DAIŞ’ê li gelek navçe û deverên bajêr li nêzî gulistan, parka lawiran û lîstokgehan, çalên bi awayekî paralel kolandibûn û cenazeyên sivîl bê ser û ber avêtibûn goran.
Di gorên komî de cenazeyên zarok, jin û ciwanên ku çeteyan ji xwe re kiribûn mertalên zindî, hene. Ji destpêka rizgarkirina Reqayê ji hêla QSD’ê ve, Yekîneya Bersivdariya Yekemîn hezar û 238 cenaze derxistine.Li gorî belgeyên yekîneyê, welatiyên bajêr 117 daxwaznameyên cenazeyan pêşkêş kirinê, lê yekîneyê tenê 17 cenaze derxistine.Ji bo cenazeyên welatiyan bi awayekî guncaw bêne derxistin, yekîne xebatên derxistinê bi alav û amûrên hêsan dimeşîne. Welatî bi rêya dayîna agahiyên derbarê cihê gorên xizmên xwe de yan jî bi rêya cil û amûrên kesayetî cenazeyan nas dikin û bi vî awayî alîkariya yekîneyê dikin.
Cenazeyên ku nasnameyên wan nehatine naskirin, yekîne agahiyên girêdayî her cenazeyekê li ba xwe belge dike û li goristanên şehîdan ên bajêr dispêrin axê.
Tevî hemû xebatên ku yekîneyê di vî alî de pêk anîne, lê dîsa jî ji ber tunebûna alav û amûrên pêşketî gelek caran rastî astengiyan tê.
Derbarê vê mijarê de serokê yekîneyê ya herêma başûrê Reqayê Ebdulreûf axivî û diyar kir ku yekîne ji ber tunebûna alavên nû nikare bi awayekî sîstematîk cenazeyan derxîne û nasnameyên wan bidin nasandin…ANHA
