Êzidiyên ji ber êrîşên çeteyên DAIŞ’ê ji Şengalê koçberî herêmên cûda yên Başûrê Kurdistanê bûne û di nava kampan de dijîn, rastî gelek zehmetiyan tên û ji aliyê rêveberên kampan ve tên paşguh kirin.
Piştî êrîşa çeteyên DAIŞ’ê ya 3’ê Tebaxa 2014’an bi hezaran Êzidiyên Şengalê ji neçarî koçberê herêmên cûda yên Başûrê Kurdistanê bûn û li kampan bicih bûn. Yek ji kampên Êzidî lê dimînin Kampa Bacîd Kengal a girêdayî navçeya Zaxo ya parêzgeha Dihokê ye. Mirad Xêro yek ji welatiyên di kampê de dijî û berî 10 rojan ji ber şewatê çadir û hemû eşyayên mala wî şewitîn. Lê heya niha rêveberê kampê yê bi navê Sebah Berwarî ve ti alikariyek ji bo Mirad Xêro nehatiye kirin.
Kesekî ku li wargehê dimîne û nexwest navê xwe eşkere bike, diyar kir ku heya niha gelek bûyerên şewat û yên rabûna lehiyê li wargehê çêbûne û wiha axivî; “Ev nêzî 3 meh e em li nava kampê ji ber nebûna ceyranê û kêmbûna avê pir zehmetî dikişinin. Kesên çadirên wan dişewitin rêveberiya kampê alikariyê nade wan.
Malbata Mirad Xêro ev deh rojin bê çadirin û li derve dimînin. Ji ber şewatê çadir û hemû eşyayên wan şewitîn. Heya niha ti alikarî ji bo wan nehatiye kirin. Tenê carek jî rêveberê wargehê Sebah Berwarî serdana wan nekiriye.”
Bi hatina demsala Havînê re Êzidiyên li Wargehên Başûrê Kurdistanê dimînin, gelek caran rastî bûyerên şewata çadir û rabûna lehiyê hatine. Di nava 2 mehan de ji ber şewatê 2 kesan jiyana xwe ji dest dane…ROJNEWS
Şertên jiyana Êzidiyên li kampan zehmet e
