Hevserokê Desteya Karên Derve ya Kantona Cizîrê û endamê Konseya Revêber a KNK’ê Dr. Ebdulkerîm Umer nerazîbûn nîşanî daxuyaniya Nêçîrvan Berzanî da û diyar kir ku ev daxuyanî li dijî yekîtiya netewî ye. Umer got, “PKK’ê başûr parast, yê li başûr dagirker dewleta Tirk e.”
Ebdulkerîm Umer anî ziman ku daxuyaniya Barzanî li dijî yekîtiya neteweyî ye û dagirkeriya Tirkiyê rewa dike. Umer her wiha diyar kir ku li hemberî dagirkeran yekitiya kurdî pêwîst e.
Hevserokê Desteya Karên Derve ya Kantona Cizîrê û endamê Konseya Revêber a KNK’ê Dr. Ebdulkerîm Umer derbarê êrîşên dewleta tirk a dagirker ên li ser başûrê Kurdistanê û daxuyaniya serokwezîrê herêma başûrê Kurdistanê Nêçîrvan Barzanî de axivî û diyar kir ku Barzanî bi daxuyaniya xwe êrîşên dagirkeriya Tirkiyê yên li ser başûr meşrû dike.
Ebdulkerîm Umer da zanîn ku ev demeke dirêj e dewleta tirk êrîşî xaka başûrê Kurdistanê dike, hin herêm dagir kirine û got: “Dewleta tirk bi armanca Împaratoriya Osmanî û Misakî Millî zindî bike Efrîn, Cerablus, Bab û gelek heremên cuda dagir kirin, rojane gefên dagirkirina Şengal, Mexmûr, Silemanî, Qendîl, Heleb, Mûsil, Helepçe hwd. dixwe û dixwazin wan bajaran tev li xilafeta osmanî bikin. Dewleta tirk a dagirker eşkere dibejê ku destkeftiyên gelê kurd hedef digirin. Her tim dibejin ku ew hebûna kurdan qabûl nakin. Ne parçeyek Kurdistanê, her çar parçeyên Kurdistanê hedef digirin.”
Ebdulkerîm Umer di berdewama axaftina xwe de bal kişand ser hincetên dewleta tirk ên bi armanca dagirkirinê û bi bîr xist ku Tirkiye her tim PKK’ê dike hincet da ku êrîşên xwe yên dagirkirinê li ser herêmên kurdan pêk bîne û wiha dewam kir: “Yên ku gelê başûrê Kurdistanê ji êrîşên çeteyên DAIŞ’ê xelas kirin PKK bû. Berxwedana ku gerîla li vir da meşandin pir pîroz e. PKK’ê ji bo rizgarkirina xelkê Başûr bi dehan şehîd dan. PKK başûrê Kurdistanê dagir nake lê dewleta tirk dagirkeriyê pêk tîne.”
Ebdulkerîm Umer li ser daxuyaniya Nêçîrvan Barzanî ku gotubû PKK’ê axa başûr dagirkiriye diyar kir ku daxuyaniya Barzanî li dijî yekîtiya neteweyî ye û nakeve xizmeta gel û got: “ Ev daxuyanî êrîşên dewleta tirk li ser axa başûrê Kurdistanê meşrû dike. Barzanî bi vê daxuyaniya xwe diyar dike ku ew destekê dide dewleta Tirkiyê û parastina wê dike, daxuyaniya wî xetereyeke mezin e. Dewleta tirk li dijî destkeftiyên gelê kurd tev digere, ji lew re bila kes nebe alîkarê dagirkeriyê.”
Hevserokê Desteya Karên Derve yê Kantona Cizîrê û endamê Konseya Revêber a KNK’ê Dr. Ebdulkerîm Umer di dawiya axaftina xwe de bal kişand ser yekitiya kurdan û wiha got: “Bi yekitiya gelê kurd li dijî wan êrîşan em dikarin roleke bibandor bilîzin. Her wiha girîngiya kongreya neteweyî dîsa derdikeve holê. Li dijî hemû êrîşên dewleta tirk ên li ser axa Kurdistanê pêwîst e kongreya neteweyî were lidarxistin.”…ANHA
