Navenda Nûçeyan-Qamişlo
Bi boneya 21`ê Sibatê, Roja Cîhanî ya Zimanê Dayikê, TEV-ÇAND Mezobotamiya daxuyaniyek da û ev roj li hemû gelê Kurdistanê Pîroz kir.
Daxuyanî wiha ye:
“Ziman têkiliya xwe ya xurt bi çandê re heye, ji ber ku xala herî sereke di vê qadê de ye, mirov û civaka ku ji zimanê xwe qut bibe ji nasname, çand û hebûna xwe qut dibe.
Gelên xwedî ziman û çand bi van nirxên xwe têne nasîn û hene, yên ku nexwedî van nirxan bin wekî gel nayên dîtin û dawiya wan jî windabûna ji qada dîrokê ye.
Gelê Kurd jî gelê herî resen û kevnar yê Mezopotamyayê ye, dendikên şaristaniya yekê di navbera Dicle û Feratê de di axa Kurdan de hêşîn hatine, yek nivîs, yek çandinî, yek gundevanî …hwd , bi ked û xwêdana pêşiyên Kurdan hatine avakirin û afrandin. Ev Çanda xwecihkirinê ku bi dehan hezar sal beriya zayînê di vê erdnîgariyê de bi pêş ketiye, hiştiye ku Zimanê Aryenan jî bi taybet yê Kurdan bandorê li giştî zimanên cîhanê bike. Ev yek jî li xweşiya faşîst û dagîrkerên Kurdistanê nayê. Misogerkirina hebûna xwe di tunebûna Kurdan de dibînin. Ji ber ku ziman jî hebûn û nasnameya gelan e, ji bilî komkujiyên sor komkujiyên spî jî her pêk anîne û hêjî pêk tînin.
Bi armanca bişaftin, helandin û ji holêrakirin her tim zimanê kurdî di bin qedexekirin û zextê de hiştine, li gorî agahdariyên UNESCO jî ji ber şer, komkujî, qedexe û asîmlasyonê heger bi vî awayî biçe di nava sed salî de nêzî sê hezar ziman di metirsiya windabûn û tunebûnê de ne .
Bê guman zimanê kurdî jî yek ji van zimanên ku di bin xeteriyê de ye, lê ji ber resentiya vî zimanî û bi saya wêjeya devokî û lorîkên dayikan ev ziman heta roja îro gelê Kurd aniye û hebûna wî parastiye. Bi hatina şoreşa Rojavayê Kurdistanê re jî gelek derfetên zêrînî li pêşiya hemû gelên herêmê vebûn, her kes bi zimanê xwe dixwîne û dinîvisîne. Êdî paradîgmaya neteweya demokratîk bûye mertala parastina ziman, çand û nasnameya hemû gelan.
Em wekî TEV-ÇAND MEZOPOTAMYA 21`ê Sibatê Roja Cîhanê ya Zimanê Dayikê bi gelemperî li hemû gelên cîhanê, bi taybetî jî li gelên Kurdistanê pîroz dikin.
Tovê Ziman wê her di axa Mezopotamyayê de hêşîn bibe.
Ziman; çand û nasnameya gelan e.
Ziman jiyan e.”