Idrîs Henan
Abdulrehman Selman: Rêber APO bi sentez û ramanên xwe pêşengiya têkoşîna azadiya hemû gelan kir. Ji ber van xisûsên Rêber Ocalan, navendên hegemonik di siyasetên xwe yên li dijî gelê Kurd de her cure rêbazên qirker meşandin.
Ji bo agirê aloziya cîhanî û herêmî mezintir bikin û êrişa qirkirina Kurd dewam bike, Hêzên hegemonîk ên xwedî projeya “Rojhilata Navîn a Nû” ji bo herêmê ji nû ve li gorî berjewendiyên xwe parçe bikin û nexşeyên nû xêz bikin, hebûna Rêber Ocalan projeyên wan asteng dike. Lewra Rêberê gelê kurd Abdullah Ocelan di 15’ê Sibata 1999’an de bi komployeke navneteweyî ravandin û li Tirkiyê li girtîgeha tîpa F ya Ewlehiya Bilind a girava Îmraliyê dîl girtin. Derheqê Komploya Navnetewi ya15 Sibatê û armanca wê Nûnerê Rêveberiya Xweser yê li Mîrnişînên Ereb ên Yekbûyî Abdulrehman Selman ji me re axivî.
‘Xwestin civakê bikşînin nav kaosê’
Abdulrehman Selman, destnîşan kir ku revandina Rêber Ocalan seynala destpêkirina teoriya kaos xuliqkar bû û wiha got: “Ev teorî di stratejiya xwe de xwe dispêre tunekirina kesayet, sembol û lîderên dîrokî yên xwedî bandor ku hemû nirxên civakan li dora xwe kom dikin weke astengî li pêşiya berjewendiyên xwe dibînin û hedef digirin”
Selman wiha dewam kir: “Ji bona vê yekê sîstema cîhanî ya nû xwest di şexsê Rêber Ocalan de êrişî ideolojî û siyaset azadiya gelan bike û Ocalan weke astengî ji pêşiya pratîzekirina projya xwe rake. Piştre xwest civakên pêkve dijîn bikişîne nava kaosê, pûç bike, nakokiyên mezhebî û etnîkî biafirîne û kûrtir bike. Hemû hêzên rikber ji holê rake. Piştî têkbirina hemûyan jî, xwe weke lehengê rizgarker pêşkêş bike”.
‘Rêber Ocalan afrînerê hêza baweriya neteweyî ye’
Selman bi bîr xist ku komploya navneteweyî yekser têkîliya xwe bi pirsgirêka Kurd re heye û ev xal anî ziman: “Têkoşîna azadiyê ya bi pêşengiya Rêber Ocalan li hember qirkirin û êrişên dewleta faşîst a Tirkiyê, bû sedema vejandina nasname û hişmendiya Kurd. Bi pêşengiya Rêber Ocalan Kurd bûn xwedî hêza baweriya neteweyî û li hemû qadên jiyanê xwe rêxistin kirin. Ji Kurdên çar parçeyên Kurdistanê û dîasporê re bû jêdera hêz û hêviyê. Rêber APO bi sentez û ramanên xwe pêşengiya têkoşîna azadiya hemû gelan kir. Ji ber van xisûsên Rêber Ocalan, navendên hegemoniyê di siyasetên xwe yên li dijî gelê Kurd de her cure rêbazên qirker meşandin”.
‘Rêber Apo senteza vîna jiyana azad e’
Selman di dirêjahiya axaftina xwe de bal kişand ser têgihaştina Rêber Ocalan ji cewherê projeya hêzên hegemoniya navendî re û wiha rave kir: “Rêber Ocalan ji salên nodî yên sedsaliya borî, piştî hilweşandina Sovyetan, baş têgihaştibû xeteriyên modernîteya kapîtalîst. Her çendî hewl da xwe ji rûbirûkirina vî gurî dûr bixe û çareseriyên guncaw pêşniyar dikirin, lê belê sîstema cîhanî ya nû ji bilî radestî û teslîmbûyînê tiştek qebûl nedikir. Ji xwe di felsefeya Rêber APO de teslîmkarî nîne, pêkve jiyan heye. Ji lewra Rêber Ocalan jî asta berxwedana li hemberî projeyên parçeker bi senteza îradeya jiyanê ya nû ava kir û li hemberî destwerdana hêzên kaosê, bi fikir û ramanên xwe pêşengiya têkoşîna hevbeş a galan kir”.
‘Nikarin vîna Rêber Apo paşguh bikin’
Nûnerê Rêveberiya Xweser li Mîrnişînên Ereb ên Yekbûyî Abdulrehman Selman da xuyakirin ku rastiya fikir û felsefeya Rêber Ocalan di rastiya berxwedana girtîgeha Îmraliiyê de, xwe da der ku pratîzekirina wê li Rojavayê Kurdistan, Bakur û Rojhilatê Sûriyê û Şengalê û kombûna gelan li dora projeya demokratîk a rêbertiyê, komploger vala derxistin. Selman wiha dirêjahî da axaftina xwe: “Sekin û helwesta Rêber APO, hêzên serdest mecbûr kirin ku li hesabên xwe vegerin ku êdî nikarin di ser vîna gelan a Rêber Ocalan vejandiye re gav bavêjin. Her hewldaneke binpêkirina van rêgezên Rêber Ocalan afirandine, dê kirîza navendên hegemonîk kûrtir bike û ger bi gelan re li hev neke û vîna wan paşgun bike, dê wendayiyên mezin ên dîrokî bide”.
‘Azadiya Rêber Ocalan, çareseriya piskirikên Rojhilata Navîn e’
Nûnerê Rêveberiya Xweser li Mîrnişînên Ereb ên Yekbûyî Abdulrehman Selman carek din bi bîr xist ku azadiya gelê Kurd û gelên herêmê bi azadiya fîzîkî ya Rêber Ocalan ve girêdayî ye û azadkirina wî jî tê wateya azadkirina pêşnûmeya çareseriya hemû prisgirêkên herêmê. Selman wiha bi dawî kir: “Azadiya Rêber Ocalan girêdayî gelek faktoran e. Faktora sereke jî ya navxweyî ye ku girêdayî bilindkirina têkoşîna gelê Kurd û kombûna li dora rêbertiyê ye. Aliyek din ve pêwîste çalakiyên mafên mirovan û hiqûqî ji bo parastina Rêber Ocalan mezintir û zextwar bin. Ya ku em jê re şahidiyê dikin; tirsa modernîteya kapîtalîst ji hişmendiya jiyana hevbeş û pêkve jiyana gelan e. Îro Komploya navneteweyî bi têkoşîna hevpar a gelan ku bi ruhê berxwedana Îmraliyê re bûye yek, bi pêşengiya jinên azad, têk diçe û pratîka ramanên Rêber APO bi ser dikeve”.