Konseya Rêveberiya KCK’ê ragihand ku bi civîna salê pêngava ‘Dem Dema Azadiyê ye’ nirxandiye û li ser bingehê xweparastina li dijî faşîzmê, ji bo xurtkirina Şerê Gel yê Şoreşgerî, armanca azadiya Kurdistanê û demokratîkbûna Rojhilata Navî plansazî amade kiriye.
Navenda Nûçeyan
KCK’ê bi daxuyaniyeke nivîskî encama civîna salê ya Konseya Rêveber eşkere kir.
Di daxwuyaniyê de hat diyarkirin ku civîn bi beşdariya endamên ji her qada kar, bi rengekî serketî hatiye lidarxistin û da zanîn ku li ser xeta Rêber Apo pratîka li her qada kar bi berfirehî hatiye nirxandin û biryarên gelek girîng hatine girtin.
Plansaziyên ji bo azadkirina Kurdistanê û demokratîkkirina Rojhilata Navî
Di daxuyaniyê de hat gotin ku, bidawînebûna Şerê Cîhanê yê 3. nîşana wê ye ku hêzên modernîteya kapîtalîst û dewletên herêmê ne xwediyên projeyên çareseriyê ne. Herwiha da zanîn ku sîstema mêtinger ya bi serweriya mêr tê birêvebirin, ne li Rojhilata Navî temû li seramserû cîhanê pirsgirêkan giran dike û mirovan di nava krîzên siyasî û civakî de dihêle.
Di daxuyaniyê de hat diyarkirin ku, di civînê de cereke din hatiye teqezkirin ku Konfederalîzma Demokratîk ku xwe dispêre paradîgmaya civaka demokratîk ekolojîk û azadiya jinê, di serî de ji bo Rojhilata Navî û tevayiya mirovayiyê riya yekane ya rizgariyê ye.
Herwiha di daxuyaniyê de hat zanîn ku plansaziyên cîvînê hemû li ser esasê xweparastina li dijî faşîzmê, pêşvebirina Şerê Gel yê Şoreşgerî ji bo armanca azadkirina Kurdistanê û Rojhilata Navî hatine kirin.
Di sala 2021’ê de zemînê hilweşandina desthilatdariya AKP-MHP’ê hatiye afirandin
Hat teqezkirin ku Têkoşîna sala 2021’ê li hemberî planên tinekirina têkoşîna azad û qirkirina gelê Kurd, desthilatdariya faşîst ya AKP-MHP’ê aniye ber hilweşînê. Herwiha da zanîn ku PDK’ê bi rewakirina êrişên ser Herêmên Parastinê yên Medyayê, Rojava, Şingal û Mexmûrê piştgiriya herî mezin daye desthilatdariya faşîst a AKP-MHP’ê.
Di daxuyaniyê de hat xuyakirin ku, di nava dîlgirtina 23 salan a Rêber Apo de kesekî nikariye pêşî li pêşketina têkoşîna wan bigrin, tersî wê pêşketinên girîng hatin afirandin û nêrînên Rêber Apo li Kurdistanê, Rojhilata Navî û seranserê cîhanê belav bûn. Lê hat diyarkirin ku ji bo tevgera wan, gelê Kurd, dostên wan û hêzên demokrasiyê yên cîhanê cihê rexnedayînê ye ku hê jî azadiya Rêber Apo nehatiye misogerkirin
Herwiha teqez kirin ku li gorî tesbîtên civînê li seranserê cîhanê di têkoşîna îdeolojîk-siyasî de pêşket çêbûbe jî ev pêşketin ne di asta hêza paradîgmayê de ye ku Rêber Apo destnîşan kiriye. Ji ber wê destnîşan kir ku rastiya avabûn û zîhniyeta sosyalîst demokratîk a Rêber Apo divê bi berfirehî û bi bandor bê nîqaşkirin û biryarên girîng hatin girtin.
2022 YEK JI SALÊN HERÎ KRÎTÎK E
Hat ragihandin ku sala 2022’yan di dîroka têkoşîna azadiyê de ji salên herî krîtîk e. Li hemberî vê xeterê dihat xuyakirin ku meşandina têkoşînê bi xurtkirina stratejiya Şerê Gel yê Şoreşgerî, ji bo parastina destketiyan û têkbirina êrişan şert e. Lewma îşaret bi girîngiya rêxistinî û sekna hêzên leşkerî û gel hat kirin ku vê têkoşîna giran bi ser bixin. Herwiha hat diyarkirin ku hêza esasî projeya jiyana demokratîk û azad a li ser polîtîka, îdeolojiya rast e
SALA HILWEŞANDINA FAŞÎZMÊ, AZADKIRINA RÊBER APO Û BIDAWÎKIRINA DAGÎRKERIYÊ
Hat diyarkirin ku li ser bingehê Konfederalîzma Demokratîk ji aliyê perwerdekirin, rêxistinkirin û xwebirêvebirina civakê pêşengiya rast nehatiye kirin. Diyar kir ku ev jî ji ber zîhniyeta dewletperest û desthilatdarîperest a bi feraseta sosyalîzma klasîk e ku bawer dike wê bi dewletê xwe bigihîne sosyalîzmê. Herwiha bi taybetî hat destnîşankirin ku divê gel jî ji bo afirandina derfetên jiyanê û rêveberiyê li benda deverekê nemîne. Hat teqezkirin ku Têkoşîna Xurt bi civaka demokratîk a rêxistinî dikare bê meşandin
Hat ragihandin ku di cîvîna salê de, KCK`ê îrade û biryardariya xwe teqez kiriye ku têkoşîna li dijî faşîzma AKP-MHP’ê ne azadkirina bakurê Kurdistanê û demokratîkkirina Tirkiyê tenê, ev têkoşîn di heman demê de têkoşîna azadkirina her çar parçeyên Kurdistanê, parastina destketiyan û demokratîkbûna li tevayiya Rojhilata Navî be. Lewma di serî de hêzên demokrasiyê yên li Tirkiyê bang li hêzên demokratîk, jin û ciwanan ên li Rojhilata Navî kiriye ku tevlî vê têkoşînê bibin û têkoşînê xurt bikin û wiha domand:
“Civîna me ya Konseya Rêveber bang kir ku têkoşîna 23 salan ya li dijî komployê bi pêşengiya Rêber Apo tê meşandin, di sala 50’î ya tevgera Apoyî de 15’ê Sibatê dest pê bike heta 8’ê Adarê, Newrozê, Hefteya Lehengiyê, 4’ê Nîsanê, 1’ê Gulanê û tevayiya sala 2022’an, li ser bingehê azadkirina Rêber Apo veguherîne têkoşîna azadkirina Kurdistanê, demokratîkkirina Tirkiyê û Rojhilata Navî. Bi vî rengî ji şervanên azadiyê yên Apoyî, sempatîzanan, gelê me yê welatparêz û dostan re di têkoşîna wan de serketinê hêvî dike.”