Navenda Nûçeyan
Şandeya HDP’ê ji bo piştgiriya xelkê penaber, serdana waregeha Mexmûrê û Şengalê kir. Şandeyê ragihand ku ewê rastiya Şengal, Mexmûr û êrişên dewleta Tirk ên li ser herêman, bi raya giştî re parve bikin.
Dewleta Tirk a dagirker di 1’ê Sibatê de bi dijwarî wargeha penaberan a Mexmûrê û Şengal bombebaran kiribû. Şandeya HDP’ê ji bo piştgiriya xelkê wargehê û Şenhalê, herwiha ji bo ji nêz ve dîtina şopên êrişan serdana wargehê û Şengalê kir.
Şandeyê ragihand ku ew ji berxwedana xelkê Mexmûrê û Şengalê hêz digrin û ew ne bi tenê ne.
Şandeya Partiya Demokratîk a Gelan (HDP) 10’ê sibatê serdana Şengalê kir û piştî wê berê xwe da Wargeha Penaberan a Şehîd Rustem Cûdî (Mexmûr). Şande 11’ê sibatê bi pêşwaziyek germ, kete nava wargehê.
Şandeya HDP’ê li Meclîsa Gel a wargehê bi kêfxweşiyek mezin hate pêşwazîkirin. Piştre şande çû cihê balafirên dewleta Tirk a dagirker bombebaran kirî û ji nêz ve dît. Piştî wê, şandeyê berê xwe da Saziya Malbatên Şehîdan û li wir bi sedan şêniyên Mexmûrê bi kêfxweşî û kelecanekî mezin pêşwaziya şandeya HDP’ê kir. Li saziya Malbatên Şehîdan parlamenterên HDP’ê ji bo xelkê wargehê axivîn.
‘Emê li pey doza rewa bin’
Parlementerê HDP’ê yê Şirnexê Hasan Ozguneş axivî û got, Em tevahî cangoriyên Şengal, Memxûr û azadiyê bibîr tînin û bejna xwe li ber wan de ditewînin. Em wek HDP soz didin ku emê heta dawî li pey doza we bin. Me xwest serdana Şengal û Mexmûr bikin û êrîşa 1’ê Sibatê ji nêz ve bişopînin. Dibe ku em li Bakurê Kurdistanê bin û ji we dûr bin, lê em bi we re dijîn û hun hertim di dilê me de ne. Dewleta Tirk bi van êrîşan carek din dan diyarkirin ku ew ji dûrî exlaq û pîvanan in. Lê emê serbikevin, ji ber ku rêya me, rêya heqîqetê ye.”
