Gelek Navendên PEN’ê li dijî binpêkirin, êriş û astengiyên dewleta tirkî bi daxuyaniyên xwe nerazîbûn nîşan dan û gotin, em ji binpêkirinên li Tirkiyê
Li gorî agahiyên PENa Kurdî li ser malpera xwe parve kiriye, Caroline Stockford a ku hem di PENa Norwecê de ‘Şêwirmenda Maseya Tirkiyê’ ye, hem jî ‘Endama PENa Gallerê’ ye, di hesabê xwe yê tora civakî de bi daxuyaniyekê got, ew derbarê demokrasî, mafên mirovan û azadiya derbirînê ya li Tirkiyê de bifikar in.
Caroline Stockfordê bal bire ser veguhestina Wezîrê Edaletê û got, Bekîr Bozdag, wezîrê nû, xwediyê rabirdûyeke ne baş e, di dema kuştina Tahîr Elçî yê parêzerê mafên mirovan û Serokê Baroya Amedê de, dîsa wezîr bûye, tevî ku soza peydakirina kujeran daye malbata Elçî jî, heta niha derbarê meseleyê de tiştek nehatiye kirin.
Hêjayî gotinê ye ku Bekîr Bozdag, di serdema wezîrtiya xwe ya berê de, derbarê tacîza zarokekê de, gotibû, di meseleya tacîzê de “rizaya’ zarok jî hebûye” û ev daxuyaniya wî di nav raya giştî de bûbû sedema nerazîbûnê.
Caroline Stockfordê her wiha bal bire ser biryarnameyên Serokomariyê û got, “Di van biryarnameyan de bi awayekî eşkere pîlaneke zextan û çewisandinê heye”. Li gorî Şêwirmenda Tirkiyê ya PENa Norwecê, di demên dawî de 6 malperên demokrat û sosyalîst hatine girtin û ev biryarname wê di rojên pêş de rê li ber girtina bernameyên televizyonê û malperên din jî veke.
Caroline Stockfordê da zanîn ku ew ê rewşa dawî ya li Tirkiyê bixin rojeva civîna xwe û wekî PENa Norwecê li ser rewşa heyî daxuyaniyeke nivîskî belav bikin.
PEN’a Norwecê piştî nameya endama xwe, daxuyaniyeke nivîskî belav kir û tê de heman rexneyên li jor û fikarên xwe parve kirin.
185 dezgehên çapemeniyê hatine girtin
Gelek navendên PEN’ê yên dinyayê bi îmzeya xwe piştgirî dan daxuyaniya PENa Norwêcê. PENa Navneteweyî, PENa Kurd, PENa Tirkiyê, PENa Holanda, PENa San Miguel, PENa Danîmarka, PENa Elmanya, PENa Romanya, PENa Emerîka, PENa Swêdê, PENa Esperanto, PENa Vietnamê (ya li derve), PENa Melbournê û PENa Xirwatistanê ev daxuyaniya PENa Norwêcê îmze kirine. Wan ji rêveberî û hikûmeta Tirkiyê xwest ku binpêkirinên maf û azadiyan dewam neke, rêzê ji azadiya çapemenî û medyayê re nîşan bide û rê li ber mafê xweîfadekirinê bê vekirin.
Daxuyanî bi bîr dixe ku Biryarnameyên Serokomariyê destê Lijneya Bilind a Radyo û Televizyonan (RTUK) xurt dike û heta niha bi biryarnameyan 185 sazî û dezgehên medya û çapemeniyê hatine girtin û ew guman dikin ku rewşa heyî xerabtir bibe.
Navendên PEN’ê yên ku bi îmzeyên xwe destek dan daxuyaniyê, dan zanîn ku ew ê wekî berê, ji niha û pê ve jî rewşa binpêkirinên li Tirkiyê ji nêz ve bişopînin.
Ozgûr Polîtîka
