Dilîn Ehmed-Qamişlo
Têkildarî tecrîda giran ya ser Rêberê Gelê Kurd Abdullah Ocalan, malbatên şehîdan diyar kirin ku, tecrîda ser Rêbertiyê û şerê îro li dijî yekgirtina gelan tê meşandin, ji bo pûçkirina projeya Rêveberiya Xweser û berdewamiya Komploya Navneteweyî ye.
Rêberê Gelê Kurd Abdulah Ocalan sala 1999`an bi Komployeke Navneteweyî radestî dewleta tirkî ya dagîrker hat kirin. Dewleta tirkî ya dagîrker ev 23 sal in Rêberê Gelê Kurd Abdellah Ocalan xistiye binê tecrîdeke pir giran. Herî dawî 25’ê Adara 2021ê Rêber Abdullah Ocalan bi telefonê bi birayê xwe Mihemed Ocalan re çend deqeyan diaxive piştî wê telefon qut dibe û ji wê demê ve ti agahî jê nehatine girtin. Ne malbat, ne parêzer nikarin bi Rêberê Gelê Kurd Abdullah Ocalan re hevdîtinê bikin.
`Çima li dijî tecrîda ser Rêbetiyê cîhan bêdeng e!`
Derbarê mijarê de dayîka şehîd Ciwan yê 5`ê Çileya 2014an li Til Berek şehîd bûyî Henîfa Abdullah got, tecrîda li ser Rêbertiyê li ser tevayiya gelê Kurd û Rojhilata Navî ye.
Yadê Henîfa axaftina xwe wiha domand: “Dewleta tirkî ya dagîrker ji bo şkandina vîna gelê Kurd ji aliyekî tecrîdê li ser Rêbertiyê pêk tîne û ji aliyekî din ve jî êrişî herîmên me dike. Armanc ji tecrîdê tinekirina fikir û felsefeya Rêber APO ye. Herwiha dixwaze bi êrişan jî aramî û yekîtiya biratiyê li bakur û rojhilatê Sûriyê, têk bibe. Lê bila dewleta tirkî û cîhan tev bizanin, heta yek ji me hebe emê doza azadiya Kurdistanê bikin. Emê li ser şopa şehîdên xwe û fikir û felsefeya Rêbertiya xwe bijîn.”
Henîfa Abdullah got, banga min ji bo tevayiya gelê Kurd heye ku li keda Serokê Neteweyî Rêber APO xwedî derkevin. Ne tang û topên dewleta tirkî ya dagîrker ne jî siyaseta hêzên nevdewletî, dikarin me tine bikin.
Ji bo rakirina tecrîdê, gelê bakur û rojhilatê Sûriyê bi çalakiyên cuda dadikevin qadan û bi sloganan tecrîdê şermezar dikin. Herwiha li bakurê Kurdisatê jî bi sedan girtiyên zindanan ji bo rakirina tecrîdê û azadiya Rêber Abdullah Ocalan, bi mehan e di gireva birçîbûnê de man û niha jî têkoşîna xwe ya qebûlnekirina tecrîd û işkenceya dewleta tirkî dewam dikin. 
` Cihê kesayeteke mîna Rêber APO ne zîndan e `
Herwiha hevjîna şehîd Ciwan ya bi navê Nûrda Mihemed jî diyar kir ku, dewleta tirk ya dagîrker dixwaze bi tecrîdê gel ji Rêbertiyê ji hev qut bike û vîna wan bişkîne.
Nûrda axaftina xwe wiha domand: “Ne ji mafê ti kesî ye, ne jî yê ti hêzê ye ku vê biryara tecrîdê li ser Rêbertiya me pêk bîne. Cihê kesayeteke mîna Rêber APO ne zîndan e, lewra fikir û felsefeya Rêbertiyê kilîta aloziya Rojhilata Navî ye.”
Nûrda Mihemed axaftina xwe wiha bi dawî kir: “Banga min ji gelê Kurd herwiha gelê azadîxwaz re heye ku ne tinê ji bo rakirina tecrîdê, ji bo azadiya Rêber APO têkoşîna xwe xurttir bikin. Bila hesreta dîtina Rêbertiyê ya di nava me, ji dilê me derkeve. Azadiya Rêbertiyê, xwedîderketina li xwîna şehîdan e.”
