Ji bo 177 kesên dewleta tirkî li Cizîrê di jêrzemînan de bi awayekî hovane kuştîn, çalakiya bîranînê hat lidarxistin.
Li navçeya Cizîrê ya Şirnexê 14’ê Kanûna 2015’an ‘qedexeya derketina derve’ hatibû ragihandin. Di wê demê de li Taxa Cûdî di jêrzemînên sê avayiyan de 177 kes asê mabûn. Ev 177 kes hatibûn şewitandin. Ji bo cangoriyên di jêrzemînan de hatîn kuştin, çalakiya bîranînê hat lidarxistin.
Bîranîn li avayiya rêxistina HDP’ê ya Cizîrê hat lidarxistin. Malbatên cangoriyan, çalakvanên TJA’yê, parlementerên HDP’ê yên Şirnexê Nûran Îmir, Huseyîn Kaçmaz û Hasan Ozguneş, Hevşaredarên Silopya Adalet Fîdan û Suleyman Şavlûk jî di nav de gelek kes tevlî bîranînê bûn.
Li eywanê navê cangoriyên hatîn şehîdkirin û pankarta ‘Lehengên Cizîra Botan’ hat daliqandin.
Hevseroka HDP’ê şaxê Cizîrê Zîlan Ecevît di bîranînê de axivî û got, li ber çavê dinyayê bi sedan mirovên me hatin şehîdkirin. Emê ti carî vî tiştî ji bîr nekin û nedin jibîrkirin. Çawa ku wan mirovên me gotin ‘Çi dibe bila bibe, emê çok daneynin erdê’ em jî sozê didin wan ku emê jî çok daneynin erdê.”
Parlementerê HDP’ê Hasan Ozguneş jî diyar kir heta kesên azadîxwaz hebin wê têkoşîna kesên li ser rêyê jiyana xwe ji dest dane jî bidome.
Piştî axaftinan ji bo kesên di jêrzemînan de hatîn şehîdkirin, sînevîzyonek hat nîşandan.
Bîranîn piştî dayîna mewlûdê bi dawî bû.
ANF/Şirnex
