Meclîsa Sivîl a Reqayê, piştî rizgarkirina Reqayê ji çeteyên DAIŞ’ê, gelek gavên mezin avêt û karên serkeftî pêk anî.
Meclîsa Sivîl a Reqayê ji Meclîsên herêmên din cudatir e. Meclîs di Reqaya ku bibû peytexta DAIŞ’ê piştî QSD’ê ew ji çeteyên DAIŞ’ê rizgarkirin, hat damezrandin. Bajar bi temamî hatibû wêrankirin lê ev tişt li ber Meclîsê nebûn asteng û Meclîs tevî astengiyan xebatên xwe ji bo jinûveavakirina bajar bê navber meşand.
Serkeftina Meclîsa Sivîl a Reqayê tê wateya serkeftina hemû pêkhateyên gelên Sûriyê. Hin dewletên dagirker serkeftina Meclîsê weke xeteriyekê li ser berjewendiyên xwe dibînin lewra êrîşan pêk tînin.
Çeteyên DAIŞ’ê bajar wêran û talan kiribûn. Hemû binsaziya bajêr ji ceyran, av, nexweşxane, dibistan û pirên bajêr û gundewarên wê bi rêjeya ji %85 wêran bûne. Çete beriya ku ji bajêr vekişin 8000 mayîn tê de çandibûn, ew jî xebata Meclîsa Sivîl a Reqayê asteng dike.
Meclîsê heta niha 7 nexweşxane, navendên tendrûstiyê, 232 dibistan li hemû herêman û 25 dibistan li navenda bajêr vekir. Her wiha komîteyên Meclîsê piraniya bajêr ji bermahiyên çeteyan paqijkiriye û hêjî xebatên xwe didomîne.
Meclîs 5 hezar koçber ku koçberî herêmên rizgarkirî bûne, pêşwazî kir û pêdiviyên wan yên pêwîst bi cih anî.
Hevseroka Meclîsa Sivîl a Reqayî Leyla Mistefa, bal kişand li ser desteka kêm ya navnetewî û diyarkir ku ev destek ne li gorî hewcedariyên herêmê ye.
Derbarê projeyên pêşerojê de Leyla got: “Gelek projeyên Meclîsê hene û MSD’ê desteka wê dike. Lê hin proje bi hewcedariya alîkariyên mezin heye lewra kengî ev alîkarî hat dayîn ew proje wê pêk werin”…ANHA
Meclîsa Sivîl a Reqayê karên mezin bi serxist
