Di vê hefteyê de daxwiyaniyek ji aliyê Meclisa Gel a Sûriyeyê ve hat dayîn û gotiye: Ji bo ku em HATAY’ê ji destê Tirkiyeyê derxin, emê her derfetê bidin xebitandin!
Dîsa weke her carê qîrin bi nijadperestên dewleta Tirkan ket û gef li rejîma Şamê xwarin. Gotin; em metreyeke ji xaka xwe nadin û hwd.
Van gotinên faşîstên dewleta tirkî êdî kes gelek ji xwe re nakin xem. Lê ya balkêş kesên ji gelê wê herêmê, mîna Parlementerê AKP’ê yê Hatayê Huseyin YAYMAN û Şaredarê Hatayê, ji nijadîstên tirka pirtir dikin qîrin e.
Hilbet Kurdistanî van mînakan baş nas dikin. Jiber ku li Kurdistanê van kesên wisa zêdetirin. Keryak weke M.Metiner, O.Miroglu û hwd.hene ku ji nasnama xwe dûrin û ketine xizmeta desthilatiya AKP-MHP’ê.
Hilbet hinek mînakên din jî gelek xemgîn ên weke ya Hesen Xeyriyê Dêrsimê jî hene. Jiber ku di wê demê de ji Mistefa Kemal re, him li hundur him li derve hewcedariya wî bi hêza Kurdistaniyan hebû û ji bo xapandina raya giştî dibêjin “bi cilê kurdî weke parlementerê Kurdistanî werin meclîsa Enqereyê”!
Paşê dibînin ku nikarin di xizmeta xwe de bidin xebitandin, Hesen Xeyrî û nûserê wî Mihemet Axa, bi tawana; jiber ku cilê kurdî li xwe kirine wan li sêdarê didin. Lê Diyab Axa dikeve xizmeta wan, Mistefa Kemal li rex xwe cih dide wî û li gor dilê xwe bikartîne.
Dewleta tirka, ji despêka damezrandina xwe ve heta îro jî, bi siyaset û zihniyet û hilwesta dijî mirovahî êrîşî gelê Kurdistanê û tevgerên rizgariya wê û kesayetiyên bi rûmet kiriye.
Hema yekser em werin vê dema rêveberiya faşist û nijadperest a AKP-MHP’ê, em ê bibînin ku bi şêwazên hîn dijwartir û xerabtir êrîş dike.
Hema mînaka gelek dişibî mijara vê gotarê, dema pêvajoya çareseriyê ye. Bi taybetî di kesayetiya HDP’ê de bi vê zihniyetê êrîşên xwe dan meşandin û hîn jî dewam dike.
Bi kurtayî AKP û HDP’ê, ew pêvajo hemû bi hev re hûnandin û birêve birin. Lê bi kurtayî weke mînaka Hesen Xeyrî, bi heman şêwazê ew tawanbar kirin û hejmarek mezin rêveberên HDP’ê û kesayetên di vê pêvajoyê de xebitî bûn girtin û hîn jî di zîndanan de ne.
Di vê demê de jî yên weke Diyab Axa, li her çar parçeyan hene. Bi taybetî Rêveberiya Başûr û ENKS‘êya Rojava, li gel qirkerên AKP-MHP’ê xizmetek ji ya zemanê Ataturk zêdetir dikin.
Îca em bala xwe bidin rewşa gelê Kurdistanê û Tevgêra Azadiyê, êdî ne weke wê dema berê ne. Ji serpêhatiyan ders standine, bûne xwedi hişmendiyek hêja û xwedî rêberî û tevgêra pir bi hêz in.
Jiber ku bênavber raserî ewqas êrîşên qirker hatin û Rêberî jî 23 sale di zîndanê de ye, dîsa têknaşkê, berovajî, pêşve diçe.
Erê divê mirov ji nakokiyên navbêna dagirkeran sûd bigire, lê nabe jê bi hêvî be.
Jiber ku gotinên van qirkeran ne cihê baweriyê ne. Ma hema mînaka dawî, gelo rejima Şamê dagirkeriya dewleta tirka ya nuha teze li Efrinê, Serêkaniyê, Grêspî, Cerablûs û hwd.nabîne û di ser vanan re gav dike derbasî 82 salan ya Hatayê dibe?
Tew bê eyb û bê şerm, ew dewletên dagirker her dibêjin “em hustek xaka welatên xwe nadin ti kesî” û fort û gefa dixwun! Li ser xaka gelê Kurdistanê, ew bazarê dikin, de kerem bikin!
Di encamê de divê gelê Kurdistanê, xwe li hêviya ti kesan ranegire û êşa xwe bi destên xwe bixwurîne!
