Bexçeyê Emel ê Zarokan li Tebqayê xebatên xwe berdewam dike. Zarokên ku dê û bavên wan dixebitin, di baxçe de tên xwedîkirin û her wiha tên perwerdekirin.
Baxçeyê Emel ê Zarokan ê girêdayî Meclisa Jinan a Tebqayê di meha derbasbûyî de hate vekirin. Baxçe dikeve Taxa Yekem Tebqayê. Armanca meclisê ji vekirina baxçeyê zarokan ew e ku zarokan li ser du qonaxan fêr bike.
Di qonaxa yekemîm de dê zarokên temenê wan di navbera 3-4 salî de xwedî bikin û ya duyemîn jî zarokên ji 5-6 salî fêr bikin.
Di qonaxa duyemîn de zarok fêrî tîp û hejmaran dibin da ku derbasî refa yekemîn bibin. Yek ji rêveberên Baxçeyê Emel Asya Reşo diyar kir ku şênî navên zarokên xwe di baxçe de qeyd dikin.
Asya destnîşan kir ku di baxçe de 8 mamosteyên xwedî tecrube û nêzî 57 zarok hene. Asya Reşo da zanîn ku ew bi awayekî zêde li zarokên temenê wan biçûk dimêzînin, ji ber ku pêwîstiya wan bi lênerînê heye…ANHA
Zarok li bexçeyê Emel dilşad in
