Rêxistina Sara ji bo parastina mafên jinan xebat û têkoşîna xwe berdewam dike. Endama Rêxistina Sara Ya Li Dijî Tundiya Li Ser Jinê, Fewziya Henîf diyar kir ku ji bo rizgarkirina jinan ew bi hemû rengî xebatên xwe dişopînin. Fewzîyeyê got, “Rêxistina Sara têkoşîna maf û azadiya jinan e.”
Endama Rêxistina Sara Ya Li Dijî Tundiya Li Ser Jinê, Fewziya Henîf têkildarî xebatên saziyê got: “Ji bo em bikaribin jinan ji tundî û êrîşan rizgar bikin em ê bi hemû rengên cuda xebatên xwe bidomînin.”
Rêxistina Sara Ya Li Dijî Tundiya Li Ser Jinê ya Kantona Kobanê di sala 2015’an de hat vekirin û li dijî tundiya li ser jinê têdikoşe. Endama Rêxistina Sara ya li dijî tundiya li ser jinê, Fewziya Henîf diyar kir ku şikandina tundiya li ser jinê ji xwe re kirine armanc û got: “Armanca me ew e ku em hemû jinan hembêz bikin, ji tundiyê biparêzin û parastina li dijî neheqiyê hînî wan bikin.”
Fewziyayê bal kişand ser derûniya jinan û wiha dewam kir: “Ji ber ku di civaka me de yên ku herî zêde rastî tundiyê tên jin û zarok in, di warê derûniyê de jî bandorên neyînî herî zêde li wan dibe. Loma me pêwistî bi beşa derûniyê jî dît. Di warê xebatên beşa derûniyê de jî em dixebitin. Lewra heta ku derûniya civakê ne baş be wê hemû tiştên din jî bi aweyekî bi rêk û pêk nemeşe. Ji bo tundiya her rengî ya li ser jinê em têdikoşin.”
SARA JI BO PARASTINA JIN E
Fewziyayê da zanîn ku Rêxistina Sara ji bo parastina mafê jinê dixebite û wiha pê de çû: “Em weke sazî hem bi pirsgirêkên jinan mijûl dibin hem jî bi perwerdekirina saziyan mijûl dibin. Di heman demê de di nava xebatên me de perwerdeya zimanê dayikê jî heye. Ji bo jin xwe nas bikin û bikaribin ku xwe bi rêxistinkirin bikin em panel, semîner, dewreyên perwerdeyê û civînan li dar dixin. Ev xebatana hem ji bo pêşketina jinê, hem jî ji bo pêşketina civakê gelekî girîng e.”Fewziyayê herî dawî wiha got: “ji bo jin rastî tundiyê neyên divê em bibin yek û têbikoşin. Heta jin rizgar nebe wê civak jî rizgar nebe. Rêxistina Sara têkoşîna rizgarkirina jinê ye.”…Nesrîn Mislim-JINNEWS/KOBANÊ
