Faruk SAKIK
Çend sal berê di salvegera damezirandina PKKê a Roj Tv de, ji gel pirsîn ‘PKK kî ye?’ Zarokekî digot; “PKK ez im, tu yî, ew e û em herkes in.”
Ev demeke girêdayî konsepta tunekirin û tasfiyekirina PKK’ê nîqaş û gengeşiyên nû destpêkirine. Ji bo PKK were kirmînalîzekirin her tişt tê kirin.
Çi dibêjin?
BAŞÛR: Bila PKK ji Başûrê Kurdistanê derkeve. Dibêjin PKK nebe dijmin êrîş nake. Ev daxwaza PDK’ê ye.
Başe, PKK ji başûr vekişe, ew kurdên azad ku di encama xebat û têkoşîna salan de hatine rêxistinkirin wê bi ku ve herin? Difikirin roja PKK ji wê herêmê vekişe kurdên azad jî wê biqedin. Na!.. wan bi PKK’ê bawerî anîne û heta metirsiya dagirkirina Başûr di rojevê de be, wê gel û PKK jî ji wêderê dernakeve.
ROJAVA: Bila kadroyên PKK’ê yên li Rojava di rêveberiya xweser de cîh negirin û ji wêderê derkevin. Amerîka li ser daxwaza Tirkan di vê helwestê de israr dike.
Çima ji Rojava kadroyên PKK’ê derkevin? Heger xebatên PKK’ê yên bi salan li ser wê xakê nebûna, gelo wê şoreş pêk bihata? Gelo ev kadroyên PKK’ê yên bi paradigmaya Rêber Apo perwerde bûne, ku wêderê terk bikin sîstema ku nû avadibe wê biserkeve? Ji bo vê yekê heta rêvebiriya xweser sîstema xwe saz neke û şerê li Sûrî bi encam nebe PKK wê li wêderê be.
BAKÛR: Bila li Bakur di serî de HDP û saziyên sivîl têkiliyên xwe bi PKK’ê re qût bikin. PKK wek rêxistineke terorîst bi nav bikin. Ev ji daxwaza dewleta Tirk e.
Li Bakûrê Kurdistanê çima PKK xwe tasfiye bike? PKK çima hat avakirin û çima şerê çekdarî da destpêkirin? Ji ber kîjan sedeman dive ew sazî li dijî PKKê bertek nîşan bidin?
Na… Heta Kurdistan azad nebe wê PKK li wêderê be. Sazî û partiyên hatine avakirin çima berî salên 90’î nedihatin avakirin? Bi PKK’ê re gel politîze bû û li her qadên civakê birêxistinbû. Partîyên legal hatin avakirin û HDP jî berdewamiya vê kevneşopiyê ye. Heger yek rêveberê HDP’ê ji bo PKK’ê gotinên ku dijmin dixwaze bibêje, wê malbatên gerîla wan çawa efû bikin?
EWROPA: Li Ewropa jî ji komele û saziyên Kurdan re dibêjin; tu carî bi PKK’ê re nekevin nava danasandinan. Al, flama û posterên PKK’ê bi kar neynin. Ev jî dewletên ku PKK’ê xistine lîsteya terorê ne.
Li gelek welatên Ewropa PKK qedexeye. Her çiqas yek delîl jî di dest wan de tunebe, ji gel dixwazin têkiliyên xwe bi PKK’ê re qût bikin. Lê ji bîr dikin; heger kadroyên PKK’ê Kurdên dîaspora birêxistin (civakî, çandî, siyasî, ziman) nekirana, wê Kurd di nav lepên sistema van dewletan de biheliyana. Ji bo vê yekê jî heta yek Kurdek jî li vêderê hebe, mîrasa ku PKK’ê hiştiye wê wî kesî biparêze.
Ev konsepta dewletên degirker û Ewropiyan, bandor li gelek kes û keseyatan jî kiriye. Difikirin heger ev daxwazên wan werin cîh, wê ji bo Kurdan hin deriyên nû vebibin. Na.. Îroj PKK hincet nîşan dide û mafê te nadin. Sibê ku PKK ji holê rabe, nasandina mafên te li dera han, wê jiyanê li te teng bikin.
Dive van daxwazên dijminan deynin aliyekê, bi ceserat û bawerî, PKK’ya ku vîna Kurda ye were parastin. Dive pêşî li hemû gotinên ku PKK’ê krmînalîze dike were girtin.
PKK di têkoşîna xwe de tiştek wisa kiriye ku ew here jî ruhê wî, wê li her deverê bimîne. Ew dixwazin vî rihî tune bikin. Dive tu jî vî ruhî biparêzî!..