Rojnamegerên bajarê Helebce diyar kirin ku bêdengiya li hemberî dagirkeriyê nayê qebûlkirin û daxwaz ji gel û aliyên siyasî dikin dijî dagirkeriyê helwestên cidî nişan bidin.
Bêdengiya hikûmeta Herêma Kurdistanê û Iraqê li hemberî dagirkeriya dewleta Tirk nerazîbûna welatî û pêkhateyên Başûrê Kurdistanê zêde kiriye. Rojnamegerên bajarê Helebce, nerazîbûn nîşanî bêdengiya li hemberî dagirkeriya dewleta Tirk dan.
Yek ji rojnamegerên bajarê Helebce Çoman Osman diyar kir ku dagirkeriya dewleta Tirk li ser xaka Başûr, berpirsiyartiya parlamento, hikûmet û aliyên siyasî dixe gumanê û wiha got; “Bêdengiya wan li hemberî hemberî vê dagirkeriyê xiyanetek niştîmanî netewî ye. Nabe ji vê zêdetir bêdeng bibin. Pêwîste dijî dagirkeriyê gavên cidî bên avêtin.”
Osman her wiha rexne li PDK’ê kir û got; “PDK ji bo berjewendiyê hizbî û desthilatî û dagirkirina qadên siyasî û aborî, bûye alikarek baş ê dewleta Tirk û anîna leşkerên Tirk. Divê tevahî komên parlamentoyê zextê li ser hikûmeta herêmê û Iraqê bikin ku pêşî li hêzên dewleta Tirk bigirin.”
Rojnamegerek din a Helebce bi navê Kelsum Hisên jî li ser heman mijarê wiha axivî; “Tirkiyê li ser dagirkeriya xwe PDK û PDK’ê jî aliyên din bêdeng kirine.”
Hisên her wiha daxuyakirin ku netifaqiya aliyên siyasî sedema nebûna helwestek giştiye û axaftina xwe wiha bi dawî kir; “Ji ber nebûna tifaqa aliyên siyasî, nekarîne helwestek giştî dijî dagirkeriya dewleta Tirk bê nişandan. Baweriya min bi îradeya gel heye ku dijî bêdengiya aliyên siyasî derkevin û qebûl nekin.”…ROJNEWS
Li dijî dagirkeriyê bêdeng nemînin
