Bi hezaran welatiyên Efrîn û Şehbayê li dijî binpêkirinên artêşa Tirk a dagirker û çeteyên wê yên li Efrînê, bi dirûşmeya “Jin ji bo Efrînê serî hildin” daketin qadan.
Meşa pêkhateyên Efrîn û Şehbayê ji Kurd, Ereb û Suryan bi pêşengtiya Kongreya Star her wiha ji bo bîranîna têkoşer Zeyeb Kinaci (Zîlan) di salvegera şehadeta wê de bi dirûşmeyan hate destpêkirin.
Meş ji stada Til Şeîr a navçeya Fafîn ber bi gundê Babnisê ve destpê kir.
Di meşê de, alên Kongreya Star, TEV-DEM, wêneyên têkoşer Zîlan, pankartên bi nivîsên “Hûn qirîna jinên Efrînê nabhîzn, ji guhertina demografî re na, ji paqijiya etnîkî re na, Erdogan kujerê jinan e û bi rihê Zilan, Avesta û Arînan em ê Efrîn rizgar bikin” hatin hildan.
Meş li gundê Babinsê veguherî mîtîngê, li vir bi navê Koordînasyona Kongreya Star Zîlan Xebat axivî û wiha got, “Em şagirtên Rêberê Gelê Kurd Abdullah Ocalan û şopdarên felsefeya Neteweya Demokratîk in. Bi sedan jin ji bo belavkirina fikrê wî çalakiyên fedayî kirin. Em soza şopandina xeta cangoriyên azadiyê didin.”
Endama Kongreya Star a Şehbayê Rîhab Hebo jî binpêkirinên leşker û çeteyên dewleta Tirk a dagirker ên li dijî jinên Efrînê şermezar kir û diyar kir ku jinên Şehbayê bi hemû pêkhateyên wê beşdarî pêngava Kongreya Star a ji bo piştgiriya Efrînê bûne. Rîhab got, “Bi rihê Zîlan, Barîn û Avestan em ê dagirkeriyê têk bibin û Efrînê rizgar bikin.”
Em ê Efrînê rizgar bikin, dagirkeriyê têk bibin
