Li Kobanê, Minbicê û Hesekê merasimên cenazeyên şehîdan

Li Kobanê cenazeyê şehîd Mehmûd Hemze û Ronî Serhed li Goristana Şehîd Dîcle, li Minbicê cenazeyê Dîbo Mihemed Çawîş li Goristana Şehîdan û li Hesekê cenazeyê şervanê QSD’ê Deysem Şihada (Seyf) li Goristan Şehîd Dijwar bi merasiman spartin axê

KOBANÊ

Şervanê Yekîneyên Antî-Teror (YAT) yê QSD’ê Mehmûd Hemze (Mehmûd Kobanê), 21’ê Tîrmeha 2012’an li gundewarê rojhilatê bajarê Hesekê di dema şopandina şaneyeke terorîst ya DAIŞ`ê şehîd bû. Şervanê QSD’ê Ridwan Tot (Ronî Serhad) 19’êTîrmehê di bersiva êrişa dagîrkeriya tirkî û çeteyên wê ya ser navçeya Eyn Îsa de, şehîd bû.

Bi sedan şêniyên Kobanê, di gel endamên saziyên sivîl, Rêveberiya Xweser, partiyên siyasî, hêzên ewlekariyê û şervanên QSD’ê bi merasîmekê cenazeyên her du şehîdan li goristana Şehîd Dîcle spartin axê.

Di merasimê de piştî rêzgirtinê Hevserokê Meclisa Leşkerî ya Herêma Firatê Ismet Şêx Hesen şehîdên şoreşê bîr anîn û got, şehîd pêşengên me ne. Şehîd Ronî bi hezaran kîlommetre qut kirin ku şerê DAIŞ’ê bike. Heta kesên mîna Mehmûd û Ronî hebin tirsa li ser vê xakê û ji tiştekî din nîne. Herwiha emê astengiyan derbas bikin û bigihin azadiya xwe.

MINBIC

Bi dehan şêniyên bajar û gundewarê Minbicê cenazeyê şehîdê  Erkêxweparastinê Dîbo Mihemed Çawîş ji ber nexweşxaneya Firatê girtin û birin goristana şehîdan ya rojavayê bajêr.

Di merasima li goristanê de endamê Hêzên Erkêweparastinê yên Minbicê Xelîl Silo axivî û got, bi saya şehîdan yekîtiya me ya li dijî dijminê mirovayiyê misoger dibe. Şehîd Dîbo Mihemed Çawîş weke hevriyên xwe têkoşiya û riya azadiyê girt. Di heman demê de bi fedekariya xwe efsaneyên qehremaniyê nivîsîn.

Endama Meclisa Malbatên Şehîdan ya Minbicê Werdê Ehmed got, em îro li pêşberî çavên dijmin birûmet disekinin. Herwiha ji bo rêzdariya ji şehîdan re ku ji bo xaka vî welatî canê xwe feda kirin, em disekinin.

Piştî axaftinan endamê Meclisa Malbatên Şehîdan ya Minbicê Mihemed El-Şêx nasnameya şehîd xwend û radestî malbatê kir. Şehîd Dîbo Mihemed Çawîş di nava slogan û tililîyên dayîkan de hate veşartin.

HESEKÊ

Li Hesekê jî cenazeyê şervanê QSD’ê Deysem Şihada (Seyf) ku li Dêrazorê li ser erkê xwe şehîd bûbû bi merasimeke biheybet li goristana Şehîd Dijwar hat veşartin. Herwiha nasnameya şehîdekî hat ragihandin.

Di merasima li goristanê de ji fermandarên YPJ’ê Newroz Rojhilat sersaxî ji malbatên her du şehîdan re xwest û got, şehîdan ji bo azadiya gelên herêmê berdêlên giran dane, emê şopdarên xeta wan bin heta ku armancên wan pêk bînin.”

Di merasimê de Meclisa Malbatên Şehîdan nasnameya şervanê Erkêxweparastinê Eseed El-Hesen yê li Hesekê li ser erkê xwe şehîd bûbû, ragihand.

Endama Meclisa Malbatên Şehîdan Rojda Ehmed nasnameyên her du şehîdan xwendin û radestî malbatên wan kirin.

ANHA